Pagbukhad sa usa ka Yasmien

Gidumog sa mga kabatan-onang Sugbuanon ang auditions sa StarStruck The Next Level nga gipahigayon kaniadtong Sept. 23-24 sa SM City Cebu ug kini gitambongan sa first princess sa 1st batch nga si Yasmien Kurdi. Liboan nga mga batan-on ang nanimpad nga makasulod sa maong talent search diin ilang gipakita ang ilang mga abilidad sa pag-arte, pag-kanta, pag-sayaw ug pag-rampa sa pamasin nga makahupot sila sa talagsaong higayon nga mamahimong artista. Ug wala gayud nagpalupig ang mga Sugbuanon nga matud pa ni Yasmien pulos gyud mga maayo.

Sa wala pa siya mo-report live sa Startalk si Yasmien nakighinabi una sa Banat Hugyaw diin iyang gihisgutan ang pagkalakip niya sa labing bag-o nga soap drama sa Kapuso Network ang Bakekang nga naghatag niya karon og dakong kalipay. Si Yasmien ang modala sa papel ni "Charming" usa sa duha ka mga anak ni "Bakekang" nga liwat gyud kaniya ang nawong nga matud pa ni Yasmien "baluga" og hitsura. Apan bisa'g unsa pa kalisod ang pag-antos sa make-up nga ibutang kaniya, dili kini igsapayan ni Yasmien tungod kay excited na siya sa maong project. "Excited talaga ako Halo-halo yung pakiramdam ko sobrang ninenerbyos ako sa role. Challenging talaga dahil kailangan pangit talaga ang itsura ko. I have to put on makapal na make-up to look negra at baluga"

Gibutyag niya nga gikulbaan siya'g maayo sa role nga gihatag kaniya tungod kay dili siya ganahan nga ma-disappoint ang mga tawo nga mitoo sa iyang abilidad ug naghatag kaniya niining maong oportunidad. "Acting piece talaga lahat ng scenes sa Bakekang kaya grabe ang expectation nila kaya I'm nervous kasi ayokong ma-upset yung directors ko na sila Gil Tejada at Kriss Adalla and siyempre si Ate Shine at iba pang mga batikang artista na kasama sa cast. Kaya gagawin ko talaga yung best ko"

Kanunay na natong makit-an nga modala og "low-profile" nga papel si Yasmien sa hapit tanan niyang projects ug bisan limitado lang ang iyang mga exposure napamatud-an niya nga duna usab siyay ikabuga kon pag-arte ang hisgutan. Dinhi sa "Bakekang" si Yasmien isip Charming adunay madrama nga kinabuhi diin siya kanunay ang daog-daogon sa kontrabida. Ug tungod sa kalawom sa karakter ni Charming, mahatagan na gayud og higayon si Yasmien nga ipakita hangtud asa siya kutob ug unsa pay mahimo niya aron mas magmabulokon ang iyang pagpuyo diha sa showbizlandia.

Sa pikas bahin dili usab mabentahaan si Yasmien sa iyang recording career. Human siya paluyohi sa iyang mga fans kaniadto sa iyang unang album nga adunay hit song nga "I Know" niariba gihapon karon ang iyang bag-ong kantang nag-ulohan og "Patuloy Pa Rin" nga padayon gihapong mabati sa mga istasyon sa radyo. Ang music video niini gi-produce pud mismo ni Yasmien ug maaninaw diha sa MYX.

Inanay na nga misaka ug mibidlisiw ang bitoon ni Yasmien sa industriya sulod sa hapit tulo ka tuig niyang wad-wad diin una siyang nakit-an sa nasud nga Pilipinhon isip kabahin sa Final Four sa Starstruck batch one. Unsa may iyang mensahe sa tanan nga naglaraw pagsunod sa iyang mga tunob?. " Be yourself dapat you have confidence, believe in yourself 'coz without it, how can other people believe in you? And do have faith in God, always pray Always try until you succeed and always do your best in everything you do"



Sa StarStruck The Next Level, upat kabuok ang mahimong mananaog kini tungod kay dili lang sila mopili og pares nga Ultimate Survivor kondili aduna nay modaog isip Ultimate Hunk ug Ultimate Sweetheart ug sila hayan makadawat og P1M cash ug P2M management contract gikan sa GMA Artist Center. Si Dingdong Dantes ug Jolina Magdangal ang mga hosts niini kauban gihapon si Raymond Gutierrez. Gikatakda kining ipagawas karong Nobiyembre.