Pipila niining maong mga character ang gihatagan og kinabuhi ni Joel Acedo usa sa mga dramaturgo diha sa naglanog-lanog nga estasyonan sa kahanginan-DYHP. Batan-on apan hinog na sa kasinatian sa natad sa pang-radyo.
Apan alegre nga hunahunaon nga aksidente ug wala sa plano ang pagka-artista ni Joel. Bag-ong mitapos sa high school ang atong bida sa dihang mikuyog siya sa iyang igsuon'g babaye sa pag-audition isip usa ka radio talent sa DYRF apan wala damha nga siya ang gidawat ug gi-train sulod sa tulo ka-buwan. Milungtad siya og duha katuig sa unang estasyonan ug mibalhin sa DYRC kauban sa pagbalhin sa nagkupot kaniya ang "Air and Eyes Production". Human sa tulo katuig nga pagserbisyo sa ika-duhang estasyonan nakahukom siya nga manimpad sa DYHP diin walo na siya ka tuig diha sa iyang pagpa-ambit sa iyang talento sa maong estasyonan.
Malipayon ug mapasigarbuhon siya nga nahimong kabahin sa maong industriya. Dinhi iyang nakita ang bili sa matag-usa ug nabati kung unsa kadako ang iyang pulos ning katilingban.
Ubay-ubay na pod ang drama sa diin usa siya sa mga nagdala, ang labing ulahi mao ang "Dili na Siya Imo" matag alas 2:00-2:30 sa hapon diin siya ang leading comedian ug ang "Tiki Tuko Siyam Napu" diin siya si Takyo. Iyang gibutyag ngadto sa Banat Hugyaw nga dili basta-basta ang iyang gibuhat nga pag-arte bisan pa man tuod nga sa tingog lamang niya kini gidaog. Matud pa niya, una siya mu-on air para sa ilang recording, gawas sa pagbasa sa script kinahanglan usab diay kining sabton ug paga-imaginon.
"Everytime nga mutrabaho ka as talent, kinahanglan gyud ka nga mu-imagine pag-ayo sa imong role, imong basahon pag-ayo, ug imong sabton pag-ayo ang script. Although dili siya direct on air, recording ni siya muagi kinahanglan gyud para mas nindot ang flow ug ang imong trabaho nindot."pagpaambit pa niya ngadto sa Banat Hugyaw.
Usa sa mga malampuson nga drama nga iyang gibitoonan mao ang bag-o lang usab natapos nga "Benedick" ang drama nga matud pa niya mitandog dili lang sa mga tigpaminaw kun dili lakip na usab kaniya. Gani tungod sa kanindot sa istorya ug pagkamaayo niya nga midala sa papel isip Benedick, ang bata nga nangandoy nga mamahimong pari, nahigugma, ug nagsakripisyo, daghan ang mituyo sa pagbisita kaniya sa estasyonan sa DYHP para makighimamat.
"Naa koy listener sa Leyte nga buta 'nya nianhi lang gyud sa station kay gusto makighimamat nako. Naa say usa ka buta gihapon sa Guadalupe 'nya ni anhi, kay lagi ganahan siya sa "Benedick" mao nga na-inspire gyud ko. Unya ako sad nga nahibaw-an nga katong dramaha, wala ko magtuo nga naa sad diay pari nga naminaw," saysay pa ni Joel.
Para kaniya dako nga hagit ang pagmugna og character kay pinaagi niini imong makuha ang atensyon sa mga tigpaminaw. Nagtuo si Joel nga mao usab kini ang rason aron ang mga tigpaminaw dili mobuwag, hinunua sila mupadayon sa pagsubay sa istorya ug pag-atang sa mga musunod pang mga yugto.
"Sa radyo imong gihimuan og fantasy ang mga tao, fantasy nga basing sa reality, pero sometimes ang mga story diri, mga scene mu-reflect sa imong kinabuhi 'nya maigo sad ka, og posible na nga mahitabo," pagtandi pa niya.
"Nakasuway ko nga nakahilak ko sa drama nga akong gida, pareha sa "Benedick" nga naibog siya ni Ana 'nya tungod kay naibog sad si Sam, iyang amigo, ni sacrifice nalang siya. Sa maong drama ako si Benedick, hahaha…" nagkatawang misubay sa iyang kaagi sa gugma.
Gawas sa radyo makita usab siya nga mopasundayag diha sa entablado sa nagkadaiyang dapit sa Kabisay-an ug Mindanao ilabi na kon dunay fiesta ug uban pang mga imbitasyon. Siya usab ang spinner sa "Kini Ang Akong Suliran nga mabati matag 1:00-1:30 pm, "Wats Da Style" alas 8:00-8:30 sa gabii, "Si Weng ug ang Tubig sa Mantayupan" alas 9:00-9:30 sa buntag.
Sa personal nga aspeto, gipalanog ni Joel nga ang pagbuot sa Ginoo na ang matuman gumikan kay malipayon ug kontento na siya sa mga grasya nga iyang nadawat karon diha sa kiliran sa iyang pamilya.