Ang mga tele-istorya nga Tres Metros ug Dugong Sagrado makita matag Lunes hangtud sa Biyernes matag alas 6:00 hangtod sa alas 8:00 sa gabii. Sublion kini pagpasalida matag Martes ngadto sa Sabado sa alas 9:00 hangtod 11:00 sa buntag alang niadtong mapakyas sa pagtan-aw sa gabii.
Ang Dugong Sagrado sugilanon sa upat ka mga kinabuhi- amahan nga nangita sa anak, batang sinagop nga nagpa-ngita sa iyang tinood nga mga gi-nikanan, anak nga nahilayo nga gilig-on sa kakabus kinsa napugos pag-buhat og dautan aron tabangan ang iyang mga pobre nga higala ug usa ka babaye kansang kaanyag ug kamanggihatagon maoy naghiusa sa tulo ka mga lalake aron makita nila ang usag usa.
Samtang ang tres metros istorya sa usa ka tiguwang nga bayot nga magbatbat sa mga panghitabo sa iyang kinabuhi sukad sa iyang pagkahimugso. Niadtong petsa 13 niining buwana gisugdan usab ang Community Bulletin-usa ka daily running chart sa mga balita ug mga gimbuhaton diha sa matag komunidad.
Dungan sa pagsugod sa bag-ong mga programa mao ang paglusad sa bag-ong ngalan sa estayon diin gitawag na kini karon og INTV-Inform, Interact Inspire ug be In-touch sa komunidad. Magpadayon ang nasugdan na nga baruganan sa estasyon paghatod og mga programa nga kasaw-an sa tibuok pamilya, mga impormasyon nga dili law-ay ug bayolente. Tumong sa estasyon ang paghatod og mga pasundayag nga nasubay sa ilang baruganan nga Clean Media-makalingaw ug makahatag og lamdag ug pagtulon-an ngadto sa usag-usa.
Gibutyag ni Nic Gabunada consultant sa maong network nga ang INTV nag-operate sobra sa duha na ka tuig ug damgo nila ang mapalapdan pa ang ilang mga audience hinungdan nga milusad sila og mga bag-ong programa. Gitawtaw ni Gabu-nada nga ang INTV-47 usa ka catholic network hinungdan nga usa sa ilang gilantaw ang pagtudlo sa mga televiewers kabahin sa mga pagtulon-an sa katolikong simbahan. Base sa ilang gihimo nga pakisusi mokapin na sa duha ka milyon ang mga tawo nga nagsunod sa ilang estayon dili lamang dinhi sa Sugbu ug Visayas apan lakip na sa Mindanao ug pipila ka bahin sa Luzon.
Si Gabunada nga kanhi konektado sa ABS-CBN mibutyag nga ubay-ubay na sa iyang mga higala nga negosyante ang mipadayag og interes pagsuporta sa estasyon pinaagi sa pagbutang og mga commercials tungod kay kumbinsido sila sa kawsa sa INTV-47 pagtunhay og mga programa alang sa tibuok pamilya. Damgo sa estasyon nga bisan pa man sa ka ngilngig na sa mga pasilidad ug special effects sa mga programa sa laing estasyon madasig ang kinabag-an pagtan-aw sa mga programa sa INTV-47 nga puno sa maayong mga hiyas ug tataw nga dunay pagtulon-an nga makutlo.