Hinakotay na og medalya sa palaro karong adlawa

Central Visayas gisubhan og daog sa volleyball ug football

CEBU, Philippines — Nagsugod na kagahapon ang pipila ka mga duwa apan ang ang kinabag-ang aksiyon sa 64th Palarong Pambansa moulbo karon pang adlawa (Huybes, Hulyo 11) diin magbaha ang mga medalya sa athletics ug swimming events didto sa Cebu City Sports Center.

17 ka gold medals ang ilogan sa unang adlaw sa kompestisyon sa track and field, samtang 24 ka bulawang medalya ang sawmon sa mga swimmers sa Olympic-size Aquatic Center sa CCSC.

Ang unang gold ning usa ka semanang torneyo alang sa labing maayo nga mga estudyanteng atleta gikan sa grade school gipaabot nga magagikan sa secondary girls’ 3,000-meter run.

Ang 19 ka mga partisipanteng delegasyon nga gipangulohan sa perennial champions National Capital Region (NCR) ug host Central Visayas (Region VII) magsugod sab sa ilang pagpanghakot og mga medala sa gymnastics, chess, ug dancesport, nga usa na karon ka regular sport.

Sa kinatibuk-an, 28 ka sports apil na ang para games nga gikatag sa 30 ka mga binyu ang kumbatihan ning tinuig nga kalihukan sa paugnat sa kusog.

Gawas sa overall champion sa elementarya ug high school divisions, dunay say ideklara nga overall champion matag sport sa laing unang higayon sa kasaysayan sa Palaro.

Sa laing bahin, ang host Central Visayas misikad sa ilang kampanya pinaagi sa pagkadlit og kadaogan sa volleyball ug football. Didto sa Don Bosco Technical College (DBTC) field sa Barangay Punta Princesa, elementary football team sa host nga rehiyon nga gitimon sa mga Bosconian booters ubos ni coach Glenn Ramos milampaso sa Bicol Region, 4-0.

Si Anthony James Abarquez maoy unang milansang og goal sa duwa kortesiya sa maanindot nga pasa gikan ni Zachary Fernandez, nga naka-iskor sab sa second half. Sila si Rain Chris Cabanada ug Mikhael Lukas Pazon ang mibomba sa laing duha nila ka goals. Sa secondary football, ang Central Visayas, nga gi-representahan sa Sacred Heart School-Ateneo de Cebu ubos ni coach Ref Cuaresma, mibugha sa Ilocos Region, 3-1, didto sa Fr. Julian Hernando SJ Athletic Field sa SHS-Ateneo sa Barangay Canduman, sa dakbayan sa Mandaue.

Sila si Marco Ouano, William Barlo, ug Nathan Tabon ang mituboy sa Central Visayas ngadto sa dalaygon niining pagpaluhod sa mga bisitang Ilocano.

Sa pinaksitay didto sa University of San Jose-Recoletos (USJ-R) Basak Campus Gym, ang mga pambato sa Central Visayas sa secondary girls volleyball nakaipsot batok sa CARAGA Region sud sa tulo ka sets.

Ang Central Visayas spikers ubos sa paggiya ni coach Roldan Potot nahagba sa unang set, 18-25, apan milusad og madasigon nga resbak aron pakagingon ang CARAGA sa sunod nga duha ka sets, 25-15, 25-22.

Makutas ug kulbahinam ang nahitabong kumbati sa ikatulong set nga miresulta ngadto sa 11 ka panagtabla apan ang Central Visayas, nga gilangkoban og mga USJ-R players ubos sa liderato ni Rachel Tecson, mitali og tulo ka sagunson nga puntos aron silyohan ang una nilang daog.