Kanhing pulis gidakop

CEBU, Philippines — Gidakop ang usa ka 40-anyos nga kanhing pulis human nakuhaan og armas nga walay lisensiya atol sa pagpatuman sa search warrant sa Sitio Biasong, Barangay Bonbon, ning dakbayan, hapon sa Biyernes, Oktubre 16.

Giila sa kapulisan ang dinakpan nga si Lowell Alit Reyes, residente sa maong lugar. Ang mga sakop sa Criminal Investigation and Detection Group (CIDG) Mandaue City Field Unit, Cebu City Police Office (CCPO) ang nilusad sa maong operasyon.

Gibase ang operasyon sa Search Warrant  nga giisyu ni Regional Trial Court Branch 17 Executive Judge Anacleto G. Debalucos niadtong Oktubre 15, 2026.

Narekober gikan sa balay sa suspek ang usa ka kalibre .45 nga pistola nga adunay marka nga Colt Automatic ug serial number 119125, usa ka steel magazine ug lima ka  bala.

Matud  sa CIDG, nakadawat sila og impormasyon gikan sa usa ka concerned citizen nga ang suspek gikatahong nagtinil og armas nga walay lisensiya sulod sa iyang pinuy-anan.

Gikataho usab nga makadaghang higayon kining nakit-ang gadaladala ug nagpakita sa maong armas sa publiko samtang nakainom og makahubog nga ilimnon, hinungdan sa  kahadlok ug kabalaka sa mga residente.

Ang dinakpan gidala siya sa buhatan sa CIDG Mandaue CFU  pasakaan og kasong kalapasan sa Republic Act 10591 o Comprehensive Firearms and Ammunition Regulation Act.