Poverty incidence sa Sorsogon mikunhod — PSA

CEBU, Philippines — Mikunhod ngadto sa 15.1 porsyento ang poverty incidence sa mga pamilya sa Sorsogon niadtong 2025 gikan sa 28.4 porsyento niadtong 2023, base sa datos sa Philippine Statistics Authority (PSA).

Ang pagkunhod nagpasabot nga mikunhod usab ang ihap sa mga pamilyang kabus ngadto sa 32,000 gikan sa 53,400 niadtong 2023.

Matud sa PSA, mikunhod usab ang individual poverty incidence sa probinsya ngadto sa 21.8 porsyento gikan sa 37.9 porsyento. Ang ihap sa mga kabus nga indibidwal mikunhod ngadto sa 187,700 gikan sa 330,400.

Si Senador Francis “Chiz” Escudero nga gobernador sa Sorsogon gikan 2019 hangtod 2022, miingon sa gipadala nga press statement nga kinahanglan ipadayon ug palig-onon ang mga programa sa panginabuhian, suporta sa mga kooperatiba ug social protection aron mas daghang pamilya ang makalingkawas sa kakabos.

Gidayeg usab ni Escudero si Gobernador Boboy Hamor tungod sa pagpadayon ug pagpalapad sa pipila ka mga programa nga gisugdan atol sa iyang termino, ilabi na ang mga inisyatiba alang sa mga mag-uuma, mangingisda ug gagmay’ng negosyante.

Atol sa mga lockdown tungod sa COVID-19, gipaspasan sa provincial government ang pagtukod sa mga dalan aron makamugna og trabaho ug gipalig-on ang disaster preparedness sa lebel sa barangay. Gipatuman usab ang mga programa sa peace and order, lakip na sa mga proyekto niini ang farm-to-market roads, water systems, electrification ug livelihood assistance.

Sumala sa PSA, ang Sorsogon nabalhin gikan sa Group 4, nga naglangkob sa mga lugar nga adunay 20 hangtod 30 porsyento nga poverty incidence niadtong 2023, ngadto sa Group 5 nga adunay 10 hangtod 20 porsyento niadtong 2025. Ang 15.1 porsyentong poverty incidence sa Sorsogon mas ubos usab sa 16.8 porsyentong average sa tibuok Bicol Region. (BANAT NEWS)