US nidonar OG P10 milyon vs tuberculosis

CEBU, Philippines — Nakadawat ang Lapu-Lapu City Government og unang P10 milyones nga pundo gikan sa Estados Unidos aron mapalig-on ang mga programa sa pagpugong, pag-ila ug pagtambal sa tuberculosis (TB) sa siyudad.

Pormal nga gitugyan ang unang tranche sa pundo atol sa pagbisita ni U.S. Ambassador to the Philippines Lee Lipton sa City Hall niadtong Biyernes, Oktubre 16, 2026.

“We are here to fight against tuberculosis together, and here’s the best part: I am happy to announce that the United States is providing US$316,000 to the City Government of Lapu-Lapu to strengthen tuberculosis prevention, diagnosis, treatment and care,” matud ni Lipton atol sa seremonyas.

Ang P10 milyones maoy unang bahin sa kinatibuk-ang US$316,000 nga grant, katumbas sa gibana-banang P19.9 milyonES, ubos sa Tuberculosis Implementation Framework Agreement (TIFA) ug Health Commitment Grants.

Ang nahibiling pondo ipagawas sa sunod nga mga tranche, depende sa pagkab-ot sa siyudad sa mga target ug kalampusan nga gikasabotan alang sa programa.

Gamiton ang unang pundo sa City Health Office aron mapaayo ang pag-ila ug pag-diagnose sa TB, contact tracing ug pagtambal, lakip na ang paghatag og mga importanteng tambal.

Gipili ang Lapu-Lapu isip usa sa mga benepisyaryo sa grant tungod kay usa kini ka highly urbanized city (HUC).

Walo ka local government units (LGUs) sa nasud ang gilauman nga makadawat og susamang grant gikan sa Estados Unidos, lakip ang Mandaue City, Puerto Princesa sa Palawan, Zamboanga del Sur, Siquijor Province ug Isabela Province. Ang Lapu-Lapu nagsilbing pilot LGU sa maong programa.

Sa pakighinabi sa The Freeman/Banat News niadtong Biyernes, si City Health Office head Dr. Nelner Omus niingon nga dako og matabang ang maong pundo para sa screening, pag-ila sa mga kaso sa TB ug pagtambal ug preventive care sa mga pasyente.

“With early detection, of course, comes early treatment, and with early treatment, we can curb the spread of the disease,” matud ni Omus.

Base sa datos nga gihatag sa City Health Office, miabot sa 7,228 ka tawo ang naabot sa active case finding, 40,440 sa intensified case finding ug 1,602 sa enhanced case finding sulod sa unang unom ka bulan sa pagpatuman sa programa. Samtang, 2,098 ka tawo ang nalakip sa contact investigations.

Ang siyudad dunay 183 ka pasyenteng na-diagnose nga adunay TB nga kasamtangan nila karong gitambalan, samtang 231 ka tawo ang nakadawat og TB preventive treatment.

Pinaagi sa unang P10 milyones nga pundo gikan sa America, mopalit ang City Health Office og mga kagamitan, lakip ang mobile X-ray van ug mga cartridge.

Nagkuha usab kini og mga personnel sama sa radiologists, radiologic technologists, TB navigators ug mga nurse aron masuportahan ang pagpatuman sa programa.

Matud ni Omus, ang TB nagpabiling sa nag-unang 10 ka hinungdan sa morbidity ug mortality sa Lapu-Lapu City.

Bisan pa niini, miingon siya nga nakab-ot sa siyudad ang treatment success rate nga kapin sa 90 porsiyento.

Gipasalamatan ni Mayor Ma. Cynthia “Cindi” King-Chan ang gobyerno sa Estados Unidos tungod sa tabang ug giila ang papel sa Department of Health (DOH) Central Visayas ug sa mga lokal nga health worker sa pagpatuman sa mga programa sa paglikay ug pagtambal sa TB.

Mitambong usab sa kalihokan si Lapu-Lapu City Lone District Representative Junard “Ahong” Chan, Vice Mayor Dr. Celsi Sitoy, mga miyembro sa City Council, DOH-7 Regional Director Dr. Joshua Brillantes, mga kawani sa City Health Office ug mga representante sa U.S. Embassy.

“With this grant, it will be piloted here in Lapu-Lapu how early detection, active case finding and treatment should really start, and even post-exposure prophylaxis,” matud ni Brillantes.  IBM BANAT NEWS