Magdaghan lang ang recess

Matud pa sa Department of Education (DepEd), gibanabana nga adunay 23,000 ka mga eskwelahan nga walay nagdumala nga principal tungod kay sagad sa mga aplikante sa maong posisyon wala makapasar sa qualifying examination.  Lisod ang pagpadagan sa eskwelahan nga walay principal kay magdaghan lang unya ang recess kay sa klase. Sama ra usab kini sa barko nga wala’y kapitan, mahimong walay klarong padulngan.  Haum niini ang panahom nga “Ang eskwelahan nga walay principal, usa ka eskwelahan nga walay prinsipyo.”  Fezteleern!

Mas bentaha ang ghost employee

Gihukman sa Sandiganbayan si kanhi Quezon City Councilor Roderick Paulate nga mabilanggo hangtud 62 ka tuig tungod sa kasong graft ug palsipikasyon sa mg public documents kabahin sa pag-hire og mga “ghost” employees sa iyang buhatan niadton 2010.     Sa nag-artista pa si Paulate, apil siya sa cast sa horror movie nga “Shake, Rattle ang Roll, diin hadlokan kaayo ang iyang personalidad sa maong salida.  Apan sa dihang na-konsehal na, naisog na diay siya kay daghan man siya’ng gigama nga mga “ghost”.  Matud pa sa akong amigo, “Aduna hinoo’y bentaha ang “ghost” employee sa mga regular employees kay dili sila reklamador unya perfect pa gyud ang attendance.”  Madahaan!

Bias ang ubang Senador

Segun sa survey nga gipahigayon sa Pulse Asia niadtong Septiyembre 17-24, mitumaw nga mayoriya (60%) sa mga Pilipino nagtoo nga adunay mga senador nga dili patas sa ilang desisyon sa impeachment trial ni Bise Presidente Sara Duterte.  Nasuta na gyud sa survey ang gihambin nga pulso sa katawhan kabahin sa bias sa mga senador ug nakasabot na ang katawhan sa lintunganay sa ilang katuyoan.  Matud pa sa akong amigo, “Tungod ni’ng nakita nga bias sa mga senador, nahisama na lang hinoon ang impeachment sa telenovela diin ang manan-away nahibalo na kon kinsay mabuhi ug kinsay mamatay.”  Atalaa lagee!

Prescribed sando uniform

Tugotan sa DepEd ang mga estudyante sa publikong tulonghaan nga magsul-ob lang og sando inig tambong nila sa klase basta dungganon lang kini ug dili law-ay tan-awon.  Dili una mag-inistrikto ang DepEd sa pagsul-ob sa school uniform tungod sa kainit sa panahon nga dala sa El Niño.  Mora’g gipanglantawan nga, aron maanindot gihapon tan-awon ang mga estudyante, aduna unya’y i-prescribe nga matang sa sando ang DepEd.  Matud pa sa usa ka ginikanan, “Dili na lage mag-school uniform pero basin ang sando nga ipasul-ob kinahanglan gihapon nga ma-uniform. Lain na pud nga gasto.” Pagkatoytoy!

Mahikatawa sa pasangil

Gikasagmuyo ni Cebu City Councilor Harry Eran ang pagtumbok lang kaniya nga maoy nagpahigayon sa pagsaka sa presyo sa giproponer nga pyrolysis project alang sa solid waste project sa dakbayan gikan sa orihinal nga P250 million, ngadto na sa P 470 million.  Hugot nga gisalindot sa konsehal ang mga pagduda nga aduna siya’y kalabutan sa pagsaka sa presyo sa maong proyekto.  Dili angay mangugat ang konsehal tungod kay ginaingon man nga “Ang adunay malinis nga galamhan, mahikatawa lang sa sayop nga mga pasangil.”  Muleeng!