Nag-inom sa bingkahan, gipusil patay

CEBU, Philippines — Patay diha-diha ang usa ka 34-anyos nga kanhi dispatcher sa pampublikong sakyanan human gipusil sa makadaghang higayon sa usa ka lalaki samtang ang biktima nag-inom uban sa mga higala sa tindahan og bibingka sa Barangay Mantalongon, lungsod sa Barili, alas 2:50 sa hapon niadtong Sabado, Oktubre 10.

Ang biktima giila lamang sa alyas nga Ram, residente sa maong barangay apan lumad nga taga Barangay Valencia, Carcar City. Kanhi siyang dispatcher sa mga pampublikong sakyanan nga nakabase sa Carcar City.

Base sa inisyal nga imbestigasyon, nag-inom ang biktima uban sa iyang mga higala sa tindahan og bibingka nga nahimutang daplin sa karsada sa dihang giduol sa wala pa mailhing tawo ug gipusil siya sa makadaghang higayon.

Nakaangkon ang biktima og daghang samad pinusilan sa nagkadaiyang bahin sa lawas, lakip na sa ulo, nga maoy hinungdan sa iyang hinanaling kamatayon.

Nagsul-ob og itom nga jacket ug helmet ang mamumuno, samtang gitabonan usab sa gamayng panapton ang ubos nga bahin sa iyang nawong aron dili mailhan.

Human sa pagpamusil, dali siyang misibat ug misakay sa itom nga scooter-type nga motorsiklo paingon sa lungsod sa Aloguinsan.

Narekober sa mga imbestigador sa crime scene ang unom ka basiyo sa bala ug tulo ka fired bullets nga posibleng makatabang sa dugang nga imbestigasyon.

Nakadawat og tawag ang Barili Municipal Police Station gikan sa usa ka concerned citizen kalabot sa pagpamusil.

Pag-abot sa kapulisan, naabtan ang biktima nga nagkulob sulod sa tindahan ug nagkadugo ug wala nay kinabuhi.

Padayon karon ang imbestigasyon sa kapulisan aron matino ang motibo sa krimen ug mailhan ang responsable sa pagpamusil. — /IBM (BANAT NEWS)