41 kilong shabu nasakmit
CEBU, Philippines — Gibanabanang 41 ka kilong gidudahang shabu nga nagkantidad tanan og P278. 8 milyones ang nasakmit sa hiniusang anti-drug operation sa Philippine Drug Enforcement Agency Region 7 (PDEA-7), PNP Drug Enforcement Group Special Operations Unit 7 (PNP DEG SOU-7), ug Mabolo Police Station 4 sa Arca Street, Barangay Mabolo, Cebu City niadtong Domingo sa buntag.
Lakip sa mga narekober sa operasyon ang buy-bust boodle money ug usa ka pribadong sakyanan nga Toyota RAV4 nga adunay plaka nga ZKM 377. Usa ka 30-anyos nga habal-habal driver nga giila sa alyas nga Emon, residente sa Basak- Pardo ang nadakpan atol sa operasyon.
Pero ang pangangkon sa suspek gisugo lamang siya sa iyang amigo sa pagkuha sa gidudahang ilegal nga drugas ug gibayran siya og P10,000 matag semana.
Base sa inisyal nga impormasyon, kapin usa ka bulan nga surveillance ang gihimo sa mga otoridad sa wala pa gilusad ang operasyon.
Gituohang mokabat sa lima hangtod 10 ka kilo sa ilegal nga droga matag semana ang gipangapud-apod sa maong grupo.
Matud pa sa otoridad, ang dinakpan maoy tighatud sa illegal nga drugas nga gikan sa Zamboanga nga dalhon diri sa siyudad sa Sugbo.
Gisusi pa sa mga otoridad ang gigikanan sa mga droga ug ang posibleng kalambigitan sa suspek ug giingong ang ilegal nga kalihokan ang tibuok Isla sa Sugbo.
Ang dinakpan anaa karon kasamtangan gikostodiya sa PDEA 7 mag atubang og kasong kalapasan sa Sec. 5 og Sec. 11 Art. 2 RA 9165. — /IBM (BANAT NEWS)
- Latest
