85 ka responders nigradwar sa COC Training

CEBU, Philippines — Niabot ngadto sa 85 ka responders nga gilangkuban og emergency personnel ug volunteers ang nakahuman sa lima ka adlaw nga Certificate of Competency (COC) Training ubos sa Batch Sandigan 2026-03 nga gipahigayon diha sa ballroom hall sa Cebu City Sports Center niadtong niadtong Oktubre 9, 2026.

Lakip sa mga nakagradwar ang mga sakop sa Cebu City Disaster Risk Reduction and Management Office (CCDRRMO), mga barangay responder, ubang emergency response personnel ug mga boluntaryo nga andam motabang sa panahon sa kalamidad ug emerhensiya sa syudad.

Base sa taho sa Cebu City PIO, gisugdan ang pagbansay-bansay niadtong Oktubre 5 diin gipangulohan kini sa Bureau of Fire Protection (BFP)-7 pinaagi sa pakipagtambayayong sa Cebu City Fire Station (CCFS) ug CCDRRMO.

Apil sa pagbansay-bansay ang pagpahanas sa pagpawong sa sunog, rescue operations ug basic life support aron mas maandam ang mga partisipante sa pagresponde sa nagkadaiyang emerhensiya ug paghatag og tabang sa mga komunidad nga nanginahanglan.

Nitambong si Mayor Nestor Archival sa seremoniyas sa graduation diin iyang gipasalamatan ang BFP sa pagbansay ug sa mga gradwado sa ilang kaandam ug dedikasyon sa pagserbisyo sa siyudad ug aron makatabang ug pagpanalipod sa katawhan ilabi na panahon sa kalamidad ug emerhensiya. — /BDB (BANAT NEWS)