Expose ni Sara
Si Bise Presidente Sara Duterte usa sa labing unang nibisto sa budget scandal sa administrasyon ni Presidente Ferdinand Marcos Jr. Isip education secretary sugod sa Hulyo 2022 hangtod sa Hulyo 2024, nakabantay siya og mga timaan sa maniobra:
Niadtong 2023, nahibulong siya nga ang P5 bilyones nilang budget para sa classroom construction niburot ngadto sa P15 bilyones sa bersiyon sa budget nga gipasar sa Kongreso ug gipirmahan sa presidente; ug
Nakumbinser siya sa maniobra dihang gipahibawo sa pipila ka kongresista nga silay magbuot sa mga proyekto sa gi-umintohan nga budget.
* * *
Wala dayon magsaba si VP Sara sa iyang nahibaw-an. Nagsugod na lang og reklamo dihang gi-apiki na sa mga kongresista ang iyang gipangayo nga budget sa Office of the Vice President (OVP) sa 2025. Gikuti-kuti nang iyang mga proyekto ug unsay gigastohan sa iyang confidential funds.
Mao nga niadtong Septiyembre 2024, human nagdumili sa pagtambong sa deliberasyon sa House appropriations Committee, nipagawas og video message si VP Sara nga nipasangil nga ang tinuig nga budget gikontrolar og duha ka politiko: Kanhi House Speaker Martin Romualdez ug kanhi Kongresista Zaldy Co.
* * *
Human gipanghimakak dayon nilang Romualdez ug Co ang pasangil, nahilom si VP Sara. Imbes maningkamot sa pagmatuod sa pasangil, kay direkta ang iyang kasayuran isip kanhi pangulo sa Department of Education (DepEd), wala siyay gipakita nga ebidensiya, wala gani nganli kinsa ang mga kongresista nga nanghilabot sa classroom construction.
Kon gitinuod pang VP Sara ang expose, maluwas unta niyang mga magbubuhis gikan sa kinawatay sa 2025 budget nga gihulagway nga maoy labing kurakot sa kasaysayan.
* * *
Dili inutil si VP Sara. Kapin 700 ang mga trabahante sa OVP. Kon gitutokan pang eskandalo, siya untay kinadaghanan og ebidensiya sa pangurakot sa administrasyon. Nganong wala man niya lihoka?
Tungod ba kay tapolan siya (kumbinsidong mas sayon ang pagsulti kay sa pagtrabaho)?
Wala bay katakos sa pagpangimbestigar ang iyang mga sinaligan nga gihakot gikan sa Davao City Hall ngadto sa OVP ug DepEd?
Wala ba kahunahuna pagkiha sa mga kawatan kay nabuhong ang duha niya ka upisina sa P612.5 milyones nga confidential funds nga gipakaingon nga magasto bisan asa sama sa iyang gihimo sa mayor pa?
* * *
- Latest
