Seryosong hulga sa mga bata

Sa pag-uso na sa gadget, nawala ug nataligam-an na ang tanang naandan nga kalingawan sa mga bata kay nakatutok na man sila sa cellphone, iPad, ug ubang mga kahimanan sa pagduwa gamit ang internet ug social media.

Samtang ang mga ginikanan, gigamit usab ang mga gadget aron malingaw ang mga anak kay dili man gusto nga matugaw sa ilang ka-busy sa trabaho. Wala pa gani'y buot ang mga anak, gipakaonan na og cellphone kon mohilak, ug walay limitasyon ang paggamit nila sa mga gadget nga walay superbisyon.

Ang kinaiya o batasan sa mga bata naumol nga nahimong kabahin ang impluwensya sa ilang mga nakita sa social media, apil na ang mga online games nga brutal na kaayo ang tema. Manghagis na ang mga bata kon badlongon sa mga ginikanan. Samtang ang mga ginikanan magsigi ra ba og yawyaw ug mangasaba sa anak nga mag-ingon, “Adik na kaayo mo anang cellphone!”

Kinsa man ang mabasol? Walay lain kundi ang mga kunsintidor nga ginikanan kay gianad nila ang mga anak sa gadget tungod kay mao ra man kini ang sayon nga pamaagi sa pagpakalma sa bata—apan wala sila masayod nga sila mismo ang naghimo sa ilang mga anak nga pirteng gahiag ulo ug mabinantayon.

Sa mga nahitabong pagpamusil sa mga eskwelahan, mahimong napugngan unta kini kon sa balay pa lang sa mga tunghaan gisiguro na sa mga ginikanan nga walay gidalang armas ang ilang mga anak. Ang balay mao ang unang depensa sa mga bata sa wala pa ang mga tunghaan.

Gawas sa materyal nga mga butang, kinahanglan usab nga sigurohon nga maayo ang mental ug emosyonal nga kahimtang sa bata kay basin naa na kini'y gihambin nga bug-at nga isyu sama sa bullying ug ang pag-ubos sa grado.

Ang angayan nga buhaton sa mga ginikanan mao ang pagpangumusta sa mga anak kada buntag ug kada gabii, ug pangutan-on kon unsay nahitabo sa ilang adlaw sa eskwelahan.

Gahini og oras ang pakig-storya sa imong mga anak, kay basin pareho ra kamo nga nagumon na sa gadget ug wala na magpangumustahay tungod kay pulos na lang gunit sa cellphone.

Okey ra man nga panggaon ang anak, apan kinahanglan nga dunay limitasyon o utlanan kon hangtod asa ug hangtod kanus-a ra ang paggamit sa internet, ug kinahanglan nga monitoron ang ilang mga gipangtan-aw. Ug kon moadto sa eskwelahan, sigurohon nga walay gidalang bisan kutsilyo lang, samot na kon pusil.

Magtinabangay ang tanan inay nga magbinasolay, aron masiguro nga dili mahimong ulipon sa mga daotang impluwensya nga nakatanom na sa social media ang atong mga anak.