Yulo brothers sasalang sa training camp sa Japan

MANILA, Philippines — Sasalang ang mag-utol na Carlos at Eldrew Yulo kasama ang Philippine gymnastics team sa isang two-week training camp sa Japan bago magsimula ang kanilang event sa 20th Asian Games sa Aichi-Nagoya.

“Right now we’re preparing po our training camp before we go to Asian Games, mauuna kami doon ng two weeks for training camp,” sabi ng two-time Olympic gold medalist na si Carlos.

Nakatakda ang Aichi-Nagoya Asiad sa Setyembre 19 hanggang Oktubre 4.

Idaraos naman ang artistic gymnastics competition sa Setyembre 20 hanggang 24 sa Nagoya City General Gymnasium sa Japan.

Hindi pa nananalo ng gymnastics medal ang Pilipinas sa paglahok sa Asian Games.

“Iyon lang naman palagi ko ring dasal po sana mag-perform kami sa ninanais naming performance. And sana makauwi kami ng medals for the Philippines,” dagdag ng 26-anyos na si Carlos.

Sa kanyang Asiad debut noong 2018 sa Jakarta, Indonesia ay tumapos ang batang Tondo sa fourth place sa men’s vault at seventh place sa floor exercise.

Ang parehong events ang pinagharian ni Carlos para kunin ang dalawang gold medals sa 2024 Olympic Games sa Paris.

Lalaro rin ang 18-anyos na si Eldrew sa dalawang events sa Aichi-Nagoya Asiad.

Ang iba pang miyembro ng men’s artistic gymnastics team ay sina Southeast Asian Games Games gold medalist Juancho Miguel Besana, SEA Games double bronze medalist Justine Ace De Leon at Fil-Am Zachary Nunez.

Pamumunuan ni Paris Olympian Levi Ruivivar ang women’s artistic gymnastics kasama sina Kylee Kvamme, Chiara Dawn Andrew, Lauren Supnet at Haylee Garcia.

Ang rhythmic gymnastics team ay binubuo nina Breanna Labadan at Jasmine Ramilo at sina Jerry Ilano Jr. at Luvicar Janine Padilla ang lalahok sa men’s trampoline.