Diha sa pagpalayo

Pagpamalandong sa Malangkubong kaayohan

Niadtong batan-on pa ako hilig ko og daghang mga tawo. Gani, hilig ko og mga musika. Dili nuon ko hilig og disco. Sa akong kawhaan ka tuig sa pangalagad daghang mga tawo na ang akong gikahibalag. Daghang mga dapit ang akong nasuroy.

Apan ning mga panahona karon, daw gibati ko ang tumang kalaay nga moadto sa mga dapit nga daghang mga tawo aron lamang maglingaw lingaw. Anaa kining tinguha nga mangita og mga dapit nga hilom, dapit alang sa pag-inusara ug pagpamalandong.

Mao kini ang hinungdan nga nagpangita ko og mga dapit nga hilit ug halayo sa kadaghanan pamasin nga mas masinati ang Diosnong presensiya apan dili mahikalimtan ang kadaghanan nga angayang alagaran. Tingali kinahanglang pangitaon ang kaugalingon taliwala sa kagahob sa mga gimbuhaton, sa ngalan sa pangalagad.

Gikinahanglan nga kita magpahilayo aron mas makita nato ang mga butang ug binuhatan nga atong nabiyaan diha sa atong panaw. Mga butang nga mahimong atong naangkon ug na-internalize diha sa atong pakigsandurot sa mga nagkadaiyang mga tawo nga dunay kaugalingong mga ideolohiya ug panlantaw. Butang nga nakapawala nato gikan sa bisan unsang mahinungdanon sibo sa atong kahimtang ug panginahanglan.

Mahimo kitang mokaon og mga seafoods apan dili tanang seafoods mahimong atong kan-on sanglit adunay ubang mga seafoods diin kita mahimong allergy. Maingon nga dili tanang programa mahimong maisip nga applicable.

Usahay diha sa panaw ang mangulo dunay dakong tinguha nga mahimong hapsay ug paspas apan ang kamatuoran nagtudlo kanato nga dunay uban buot mokuyog sa panaw apan ang uban buot magpauwahi o dili gyud mokuyog. Kini tungod kay alang kanila ang maong panaw dili alang kanila busa angayan lamang nga dili sila pugson.