Suporta ni Sara

Atong dasonan ang awhag ni Bise Presidente Sara Duterte sa upisina ni Presidente Ferdinand Marcos Jr. nga ipahibawo ang tanang giaprobahan nilang mga biyahe sa ubang kanasuran sa mga opisyal ug trabahante sa gobyerno uban ang kuwentada kon pila ang gasto.

Mas dasonan pa g’yud nato ang mas lapad nga pangutana ni VP Sara, nga dugay na sab nga gustong mahibaw-an sa kinabag-an sa katawhan, ug nahimong mas dinalian sa padayong pagsamot sa baha bisan P2 trilyones nay gasto sa flood-control projects: Diin man padulong ang pundo sa gobyerno?

-o0o-

Hinaot nga bisan sa grabe nilang away karon dili magmagahi si Marcos Jr. sa paghatag sa kasayuran nga gipangayo ni VP Sara. Mas maayo ganing magsugod pinaagi sa paglista pilay gasto ug unsay kapuslanan sa mga biyahe sa presidente.

Dili sab angayng duphan sa presidente ang iyang mga alyado sa politika nga gipasanginlang nitilok sa minilyon ka pesos nilang travel allowances para sa walay kapuslanan nga junkets ngadto sa nagkalainlaing kanasuran uban sa mga sakop sa ilang pamilya (o sa pipila ka mga kaso hasta sa ikaduha nilang pamilya).

-o0o-

Mahimong mas katuohan ang awhag ni VP Sara kon:

•Mohatag og kuwentada sa iyang kaugalingong mga biyahe (nga nilungtad og 91 ka adlaw sukad 2025, nigasto og ?8 milyones puno sa ?7.4 milyones nga gasto sa gobyerno sa kuyog niyang staff ug security escorts); ug

•I-detalye sab diin og kuwarta (kay nideklarar man og zero cash on hand ug zero cash in bank sa iyang statements of assets, liabilities, and net worth sukad 2019 hangtod 2025).

-o0o-

Puslan mang nideklarar si VP Sara nga ganahan sab diay siya og transparency ug accountability, hinaot nga:

•Iya nang ipahibawo (sa walay paghisgot sa confidential nga mga detalye) unsay mga programa sa Office of the Vice President ug Departamento sa Edukasyon nga malampusong napatuman tungod sa surveillance operations nga balor og P612.5 milyones; ug

•Ipasabot nganong nag-imbento og iyang kaugalingong lagda nga ang iyang paboritong security officers ang gihatagan sa tanang kuwarta, sukwahi sa lagda sa Commission on Audit nga ang confidential funds mahimo lang kuptan ug gastuhon sa iyang gitudlo nga special disbursing officers.