CELJEM Golf Team misidlak sa Davao, first runner-up sa Recovery Championship

CEBU, Philippines — Ang bag-ohay pang naporma nga CELJEM Golf Team nga gibandera nilang Engr. Jerry Maratas, Atty. Gaudioso Melendez, Engr. Leslie Anthony Molina, ug Engr. Romeo Aguilon Jr. mihimo og impresyon sa una nilang pagsalmot sa usa ka torneyo.

Kini human ang CELJEM miangkon sa dungog isip first runner-up sa Division B sa Recovery Championship 2026 nga gipahigayon niadtong Agosto 15-16 didto sa Rancho Palos Verdes Golf Club ug South Pacific Golf Club sa dakbayan sa Davao.

Kabahin sa tinuig nga Kadayawan Festival, ang ikalimang edisyon sa prestihoyosong kalihukan nakahakot og 388 ka golfers gikan sa kapin 100 ka teams sa nagkadaiyang dapit sa nasud.

Si Maratas, nga mao sab ang dugay na kaayong presidente sa Cebu Executives and Professionals Chess Association (CEPCA), mihatud og usa ka krusyal nga performance sa katapusang adlawa. Mikadlit siya og 48 Molave points kon six-over-par sa South Pacific Golf Club aron tabangan ang CELJEM nga maka-podium.

Si Aguilon maoy labing consistent nga performer sa team uban ang  42 puntos sa unang hugna ug 47 puntos nga pinal nga hugna. Si Molina miamot og mga iskor nga 31 ug 35 puntos, samtang si Melendez midugang og 29 ug 32 puntos.

Ang CELJEM mihuman sa duha ka adlaw nga aksiyon bitbit ang kinatibuk-ang 301 puntos nga igo kaayo aron birahon nila ang tropeyo isip first runner-up sa malisud nga Division B diin sikit kaayo ang kumbati. Nagmarka kini sa usa ka maasaron nga sinugdanan alang sa bag-ohay pang nahulma nga koponan.