Namunga ang pagpursige
Maratas, Capicenio gikoronahang mga kampiyon sa pickleball
CEBU, Philippines — Napakyas sila sa pagkab-ot sa ilang tumong sa unang duha ka torneyo nga ilang giapilan.
Apan imbes nga mawad-an og kadasig, ang matag kapakyasan nakapadugang sa ilang determinasyon nga maangkon ang ilang gitinguha. Sa ikatulo nilang pagsulay, namunga na gyud ang ilang pagpursige.
Mao kini ang istorya sa mga Sugbuanong pickleballers nga sila Leiz Klade Maratas ug Jocel Ann Capicenio, nga milugwa nga mga kampiyon sa 35+ women’s doubles category sa Rocket Pickle Cebu Pickleball Festival Cebu 2026 nga gipresentar sa Omega Pickleball, nga gipahigayon niadtong Septiyembre 19-20 sa RPC courts sa Barangay Subangdaku, dakbayan sa Mandaue.
Sila Maratas ug Capicenio, nga nagrepresentar sa team nga Beauties and Bangers, mipildi nila Jhonavie Alloso ug Mary Chris Rebucias sa Toledo City Pickleball Club, 11-5, sa final aron makuha ang unang titulo sa ilang bag-ong panagpares.
"From the many attempts, lessons, and tough games to finally taking the win - this one feels extra special," matud pa ni Maratas.
"To my amazing pickleball partner, Ann, thank you for the trust, teamwork, and confidence you brought to every game. We fought for every point, lifted each other up when things got tough, and never stopped believing in the team, from the first serve to the final point," dugang pa niya.
Aduna pay laing rason aron magselebrar si Maratas.
Pipila lang ka adlaw sa wala pa niya masakmit ang una niyang korona, ang iyang bana nga si Jerry Maratas, dugay nang presidente sa Cebu Executives and Professionals Chess Association (CEPCA) ug usa ka golfer, nakampiyon sa usa ka torneyo sa golf nga kabahin sa Professional Mechanical Engineers Congress niadtong Septiyembre 8 didto sa Mactan Island Golf Club sa dakbayan sa Lapu-Lapu.
"No big words, just a grateful heart. Champion today, student of the game, always because I wanted to be better in this sport which I really love now," panapos pa ni Maratas.
- Latest
