USC Warriors namawi, Gipaluhod ang UP Cebu

CEBU, Philippines — Ang University of San Carlos (USC) Warriors dali nga namawi sa miagi nilang kapildihan pinaagi sa pagpildi sa University of the Philippines (UP) Cebu Fighting Maroons, 54-46, sa Cebu Schools Athletic Foundation, Inc. (CESAFI) Season 26 basketball tournament niadtong Lunes sa gabii, Septiyembre 21, sa Cebu Coliseum.

Si James Paolo Gica mitali og 15 puntos uban ang unom ka rebounds, duha ka assists, ug duha ka blocks sa dihang ang Warriors miduyog sa University of Cebu (UC) Webmasters sa ikaduhang dapit sa college division standings bitbit ang managsamang 4-1 win-loss records.

Ang USC nabiyaan og otso puntos, 23-31, sa halftime ug alkansi pa gihapon og singko puntos, 35-40, human sa tulo ka kuwarter apan milusad og mainit nga endgame rally aron ilogon ang labaw, 45-43, sa hingpit.

Nakabentaha pa ang Warriors og 11 puntos sa wala pa gisilyohan ang otso puntos nilang kadaogan.

Si Aron Dave Kress mihipos og 13 puntos, upat ka rebounds ug usa ka steal alang sa UP Cebu, samtang si AJ de los Reyes midugang og 10 puntos apan sa way kapuslanan kay ang Fighting Maroons bokya pa gihapon human sa upat ka duwa.

Sa high school level, ang University of Cebu (UC) Junior Webmasters milampornas sa San Roque College de Cebu (SRCDC) Greyhounds, 101-54.

Si Gamaliel Chaz de la Peña mipupo og 17 puntos ug duha ka rebounds, samtang si Jade Bialan miposte og double-double nga 16 puntos ug 14 ka rebounds uban ang usa ka assist, usa ka steal, ug tulo ka blocks sa dihang ang

Junior Webmasters miinat sa ilang baraha ngadto sa 3-1 tabla sa Cebu Institute of Technology-University (CIT-U) Junior Wildcats.

Sila si Mark Jovil Datoon, Earl Joshua Booc, ug John Terol miamot og 11 puntos matag usa alang sa Junior Webmasters, nga sayong mikontrola sa duwa, 31-14, ug sa usa ka higayon milabaw og 48 puntos.

Si Jezreel John Muñez mitapos uban ang 14 puntos, tulo ka assists, ug duha ka steals, samtang si John Raven Dumanhug adunay 12 puntos ug tulo ka rebounds alang sa Greyhounds, nga nakatilaw sa ikatulo nilang sagunson nga pildi human sa madaogon nga sinugdanan.