EDITORYAL — Pakyas nga pagpamakuna

Makaalarma ang nigawas nga balita nga mas daghan pa ang mga tawong nagpabakuna sa ilang mga binuhing iro ug iring, nungka sa mga ginikanan nga nagpabakuna sa ilang mga masuso pa nga mga anak para proteksyon batok sa tipdas.

Base sa record sa Department of Veterinary Medicine and Fisheries sa Cebu City sobra 100,000 ang nagpabakuna sa ilang mga binuhing iro ug iring. Bakuna ni kontra rabies.

Pero sa record sa City Health Department naa ray kapin 9,000 ka mga bata ang nabakunahan gikan sa kapin 90,000 ka mga batang ilang target nga mabakunahan kontra tipdas, nagpasabot ni nga 10 porsiyento ra ang nagpabakuna.

Nakatala pud sila og dul-an 200 ka mga deferred vaccinations o wala nidayun sa pagpabakuna sa ilang mga anak kay gaduhaduha ang ginikanan.

Ang Department of Health pinaagi sa tabang sa mga local government units – health departments nilusad sa Ligtas Tigdas Campaign, o Measles-Rubella Supplemental Immunization Activity (MR-SIA) karong bulana.

Pero makaalarma ang resulta tungod kay gamay ra kaayo ang nagpabakuna sa ilang mga anak. Kaning nasinati sa Cebu City, nasinati sab sa Mandaue City kay sa target nilang kapin 30,000 ka mga batang mabakunahan, kapin 3,000 lang ang nagpabakuna.

Ang Mandaue City naalarma ani, ilabi na tungod sa mga sayop nga mga gipakatap nga impormasyon sa pipila ka mga badlungong mga vloggers nga naghimo-himo og sayup nga impormasyon bahin sa pagpamakuna sa gobiyerno.

Kaning mga nag-post ug nagpasa-pasa ani nga matang sa misinformation, disinformation ug fake news bahin sa pagpamakuna sa DOH, kinahanglang mahunong na.

Ang gibuhat aning mga nagpakatap og sayup nga impormasyon bahin sa pagpamakuna, nagbutang sa peligro sa kinabuhi sa kaliboan ka mga bata nga posibleng mataptan og tipdas nga walay proteksyon.

Angay kining seryusohon sa mga otoridad. Lutoson ang mga nagpakatap niini ug pangusgan ang kampanya pagpahibalo bahin niini ug kaayohan para sa panglawas sa mga bata.

Nagkulang ba sila sa pagpahibalo? Kun sa una gani nga wala pay internet ug social media daghan mang nabakunahan ubos sa programa, nganong karon nigamay naman hinuon ang nisanong?