5 ‘tulak’ arestado sa drug den sa Taguig
Higit P1 milyong shabu nasabat
MANILA, Philippines — Isang drug den ang pinaniniwalaang nalansag nang salakayin at arestuhin ang limang indibidwal na umano’y mga ‘tulak’ na nagresulta rin ng pagkakasamsam ng nasa mahigit P1 milyong halaga ng shabu sa buy-bust operation sa Taguig City, Linggo ng madaling araw.
Kinilala ni Southern Police District-District Drug Enforcement Unit (SPD-DDEU) chief PMaj. Cecilio Tomas ang mga drug personalities na sina alyas “Jemai”, 34, alyas “Mohaimen”, 37; alyas “Moonderf John”, 32; alyas “Mark Anthony”, 41; at alyas “Erwin”, 60, na sinasabing tagapangasiwa ng drug den.
Sa ulat, dakong alas-2:40 ng madaling araw nang pasukin ng mga operatiba ang bahay sa Villa St. Brgy. Central Bicutan, kasunod ng pagbebenta sa pulis na nagpanggap na buyer. Nasamsam ang kabuuang 160 gramo ng shabu na nagkakahalaga ng P1,088,000.00, marked-money, at mobile phone na gamit sa ilegal na transaksyon.
Nakatakdang sampahan ng reklamong paglabag sa Section 5 (Sale), Section 6 (Maintenance of a Drug Den), Section 11 (Possession), at Section 26 (Conspiracy) ng Republic Act 9165 (Comprehensive Dangerous Drugs Act of 2002) laban sa mga suspek sa Taguig City Prosecutor’s Office.
- Latest
