Gilas bukas ang pinto para kay Sotto

MANILA, Philippines — Bukas na bukas ang pintuan ng Gilas Pilipinas sakaling maglaro si Kai Sotto sa second round ng FIBA World Cup Asian Qualifiers at Asian Games.

Ayon kay Gilas Pilipinas head coach Tim Cone, importante ang dalawang torneong lalahukan ng kanyang bataan.

Kaya naman kaila­ngan na kailangan nito ng solidong lineup upang maisakatuparan ang mga plano nito.

“Kai is a question. We haven’t heard from him yet, but we hope to hear from him sooner than later. The door is still open for him to join us,” ani Cone.

Sinabi ni Cone na magiging abala si Sotto sa buwan na ito dahil sa mga inaasikaso nito sa Amerika.

“The word we got is his schedule is gonna get busy on August because he has something going on in the US in terms of joining a team,” ani Cone.

Gayunpaman, kung saka­ling maglaro si Sotto ay maluwag itong tatanggapin ni Cone dahil malaki ang maiaambag nito para sa Gilas.

“The door will always be open, he’s an absolute game changer,” ani Cone.

Unang mapapalaban ang Gilas sa FIBA World Cup Qualifiers na lalaruin sa Mall of Asia Arena sa Pasay City.

Makakasagupa ng Gilas ang Jordan sa Agosto 28 kasunod ang Iran sa Agosto 30.

Matapos nito, sasabak naman ang Gilas sa Asian Games sa Nagoya, Japan kung saan dedepensahan nito ang kanilang korona.

“What’s really important also for country is the FIBA window because if we lose, then we can’t make the World Cup, and then I obviously haven’t done my job and the program will most likely have to move on,” ani Cone.