Jaja bumandera sa Cool Smashers

MANILA, Philippines — Pinatumba ng Creamline ang Nxled, 25-20, 25-23, 23-25, 25-20, sa pagsisimula ng kanilang kampanya sa 2026 Premier Volleyball League (PVL) Invitational Conference kahapon sa Smart Araneta Coliseum.

Bumanat si Jaja Santiago-Minowa ng 19 points sa likod ng 17 attacks, isang block at isang service ace para banderahan ang Cool Smashers.

Nag-ambag si Jema Galanza ng 17 markers at may 14 at 13 points sina Tots Carlos at Alyssa Valdez, ayon sa pagkakasunod.

“Masaya kami kahit na medyo nag-struggle kami sa third set. Talagang hindi rin nagpatalo nang mabilis iyong Nxled,” wika ni coach Sherwin Meneses.

Pinamunuan ni Jonah Sabete-Escamillan ang Chameleons sa kanyang game-high 20 points kasunod ang 18 markers ni EJ Carino.

Hindi naglaro si Fil-Am spiker Brooke Van Sickle para sa Nxled na inagaw ang third set, 25-23, para makabangon mula sa 0-2 pagkakabaon sa laro.

Bumida sa fourth frame sina Galanza, Carlos at Valdez para tuluyan nang selyuhan ang panalo ng Creamline na nakahugot kay setter Kyle Negrito ng 31 excellent sets.

Sa unang laro, binuksan ng PLDT ang kanilang title defense sa 25-23, 25-15, 26-28, 25-14 pagbugbog sa guest team EST Cola ng Thailand.

Pumalo si reigning PVL MVP Savi Davison ng 30 points mula sa 24 attacks, limang blocks at isang service ace para pamunuan ang High Speed Hitters, habang may 16 markers si Mika Reyes.

Naglista si libero Kath Arado ng 26 excellent digs at 12 receptions at kumolek­ta si Jovy Prado ng 21 digs at 13 receptions.

Bumanat si Nirarach Srikuta ng 14 points sa panig ng Thai guest squad kasunod ang 12 markers ni Nannaphat Moonjakham.