Obiena kampeon sa ISTAF Berlin

MANILA, Philippines — Nilundag ni World No. 12 pole vaulter EJ Obiena ang gold medal sa ISTAF Berlin matapos magposte ng 5.82 meters kahapon sa Olympiastadion sa Germany.

Ito ang pang siyam na gintong medalya ng two-time Olympic Games campaigner ngayong taon at ikaapat sa huli niyang pitong torneong sinalihan simula noong Hulyo.

“5.82m here in Berlin for the gold,” sabi ng 30-anyos na si Obiena sa isang Instagram post. “Thank you Istaf Berlin for having me. Hope to see you again next year!”

Si Ylio Philtjens ng Belgium ang kumuha sa silver medal sa kanyang 5.72m kasunod si Robin Emig (5.72m) ng France na laglag sa bronze via countback sa 10-man field.

Wagi rin si Obiena sa Istaf Berlin meet nang pagharian ang indoor competition noong Marso bukod sa mga nauna niyang panalo sa 2023 outdoor at 2024 indoor meets.

Hangad ng 6-foot-2 Pinoy pole vaulter na makasali sa bigating World Athletics Ultimate Championship na nakatakda sa Setyembre 11 hanggang 13 sa Budapest, Hungary.

Sinubukan ni Obiena na malundag ang mas mataas na 5.97m, ngunit bigo siya sa tatlong attempts.

“I missed the 5.97 so I am not going to the Ultimate championship. I started late, but I still have Brussels, I will go training now and I am looking for another competition,” ani Obiena na magdedepensa ng kanyang korona sa 20th Asian Games sa Aichi-Nagoya, Japan.

Bago ang panalo sa ISTAF Berlin ay nakakuha ng tiket si Obiena para sa 2027 World Championships sa kanyang nilundag na 5.90m sa Zurich Diamond League noong Agosto 27.

Tumapos siya sa pang-limang puwesto sa nasabing event.