Tubag sa MCWD

Giangkon sa kadagkoan sa Metro Cebu Water District (MCWD) nga wa sila makaserbisyo aron matubag ang panginahanglang tubig sa mga lumolupyo sa kabukiran, ug gihangop nila nga dunay moabag aron matuman ang maong panginahanglang tubig sa mga lumolupyo.

Sa miaging Huwebes, gihisgotan nato ang sugyot sa Worlds First Water Ventures Inc. nga mosuplay sila og tubig sa bukirang barangay sa Mabini, Pit-os, ug silingang mga barangay nga wa pa maserbisyohi og tubig sa MCWD.

Ang MCWD dunay tubag niini.

“MCWD’S POSITION ON WORLDS FIRST WATER VENTURES INC.’S PROPOSED WATER SUPPLY SERVICE IN UPLAND CEBU CITY BARANGAYS

“Ang Metropolitan Cebu Water District (MCWD) misuporta sa mga inisyatibo nga nagtinguha sa paghatag og kasaligan ug luwas nga tubig sa mga komunidad nga wala pa maabti sa among serbisyo.

“Sa among gipadangat nga technical assessment ngadto sa Konseho sa Siyudad sa Sugbo, giklaro namo nga wala kami pagsupak kabahin sa plano sa Worlds First Water Ventures Inc. nga pagtukod og water distribution system alang sa pipila ka bukirang barangay sa Cebu City.

“Dili namo tinguha ang pagpugong sa ubang water providers nga moserbisyo sa mga lugar nga wala pa nahatagan og koneksyon sa MCWD.

“Samtang wala giklaro sa Worlds First Water Ventures Inc. kun asa ang ilang tinubdan, ang corporate records nga among gisusi nagpakita mga adunay koneksyon tali sa kompanya ug sa JE Hydro.

“Ang water supply ug mga pasilidad sa JE Hydro sakop sa kasamtangang Lahug Bulk Water Supply Contract, diin gitakda nga dili mahimong mosuplay og tubig ang JE Hydro ngadto sa ubang kompaniya gawas sa MCWD.

“Gilatid usab sa maong kontrata nga ang Barangay Pit-os usa sa mga lugar diin obligado ang JE Hydro nga mo-deliver og tubig pinaagi sa MCWD.

“Tungod niini, among gihangyo ang kompaniya nga ipahibalo ang tinubdan sa ilang gisugyot nga water supply, ug ipakita nga kini independent o dili konektado sa water supply ug mga pasilidad nga gi-commit sa JE Hydro ngadto sa MCWD, sa dili pa mohimo og dugang  nga aksyon ang City Council bahin sa maong aplikasyon.

“Padayon ang pagsuporta sa MCWD sa mga paningkamot nga mapalapdan ang access sa luwas ug kasaligan nga tubig, ilabi na alang sa mga komunidad nga wala pa’y igo nga nadawat nga serbisyo sa panubig.

“Ang among baruganan pinasikad lamang nga ang maong mga paningkamot kinahanglan ipatuman sa paagi nga nagsunod sa kasamtangang mga contractual commitment, ingon man sa applicable nga mga balaod ug regulasyon.”

Unta, kining maong isyu mahatagan og tubag sa Cebu City Council.