P9.69M nga shabu nasakmit sa PDEA 7
CEBU, Philippines — Usa ka high-value target (HVT) ang nadakpan ug kapin P9.69 milyones nga gituohang shabu ang nasakmit atol sa buy-bust operation nga gipahigayon sa Philippine Drug Enforcement Agency Regional Office 7 (PDEA 7) ug Cebu City Police Office Station 7 niadtong Agosto 13, 2026, alas-3:44 sa hapon sa Sitio Lusimba, Barangay Pardo, Cebu City.
Matud ni PDEA 7 Regional Director Joel B. Plaza, ang nadakpan giila lamang sa alyas “John,” 30 anyos, usa ka construction worker ug residente sa maong lugar. Nasakmit atol sa operasyon ang 27 ka pakete sa gituohang shabu nga motimbang og mokabat sa 1,425 gramos, nga adunay gibanabanang kantidad nga P9,690,000.
Lakip usab sa nakuha ang buy-bust money, usa ka cellphone ug uban pang non-drug evidence.
Sumala sa mga awtoridad, gilusad ang operasyon basi sa impormasyon gikan sa usa ka confidential informant, ug gisundan kini og kapin walo ka semana nga case buildup aron maberipika ang kalihokan sa suspek.
Gituohang ang suspek adunay kapasidad nga makabaligya og mokabat sa duha ka kilo nga shabu matag semana, base sa impormasyon nga nakuha sa mga operatiba atol sa case buildup.
Karon, anaa na sa kustodiya sa PDEA 7 sa Lahug, Cebu City ang suspek samtang ang mga nakumpiskang drug evidence gidala sa PDEA 7 Regional Office Laboratory alang sa chemical analysis ug hustong disposisyon.
Matud pa niadtong Agosto 13, 2023, nadakpan na usab ang suspek sa Philippine National Police tungod sa paglapas sa Section 11 (Possession of Dangerous Drugs), Article II sa Republic Act 9165, o Comprehensive Dangerous Drugs Act of 2002.
Karon, mag-atubang na usab siya og bag-ong kaso apan mas bug-at kini nga kaso tungod sa giingong paglapas sa Section 5 (Sale of Dangerous Drugs) ug Section 11, Article II sa RA 9165. (BANAT NEWS)
- Latest
