3 Korean divers nasagip sa dagat

MANILA, Philippines — Tatlong Korean national divers ang matagumpay na nasagip habang palutang-lutang sa karagatang nasa pagitan ng Batangas at Mindoro.

Batay sa ulat ng Philippine Coast Guard (PCG), lumilitaw na dakong alas-5:00 ng hapon kamakalawa nang mamataan ng mga tripulante ng isang FastCat ang mga divers na magkakakapit sa gitna ng karagatan. Patungo umano noon ang FastCat sa Calapan City mula Batangas Port.

Kaagad namang nagmaniobra ang barko para sagipin ang mga divers sa pamamagitan ng pagbibigay sa kanila ng lifeboat.

Nabatid na ang mga divers ay nagsasagawa ng aktibidad sa Sabang, Puerto Galera, ngunit napalayo at nawala ang kanilang service boat sanhi upang magkapit-kapit na lamang sila habang naghihintay ng rescue.