Salida sa kanhi marines

Makatabang pagsabot sa nag-usab-usab nga bersiyon sa istorya sa kanhi marines parte sa flood control scandal kon makit-an si Orly Guteza. Siya ang labing una nga nipasangil nga gisugo ni kanhi Kongresista Zaldy Co sa paghatod og mga maleta sa kuwarta ngadto ni kanhi House Speaker Martin Romualdez. Wala na siya igkita human niatubang sa Senado sa niaging tuig.

Kon kumbinsido ang Malakanyang nga ang 18 ka nangangkon nga kanhi marines nga nidason sa pasangil ni Guteza gigamit sa mga Duterte sa kampanya pagkuha sa suporta sa militar aron mapalagpot si Presidente Ferdinand Marcos Jr. sa puwesto, apil ba si Guteza sa plano?

***

Usa ra ka adlaw nga nakit-an si Guteza sa publiko: Dihang nitambong sa imbestigasyon sa flood control scandal sa Senate Blue Ribbon Committee niadtong Septiyembre 25, 2025. Wala motunga pagsumiter sa iyang aplikasyon sa witness protection program sa Department of Justice sa Septiyembre 26.

Gipresentar siyang Senador Rodante Marcoleta isip surprise witness. Matod ni Marcoleta nga si Guteza gipaila ni kanhi Kongresista Mike Defensor, nga gipasanginlang nag-organisar sa 18 ka kanhi marines. Ang kasuod nilang Marcoleta ug Defensor niresulta sa ilang pagkapriso tungod sa P75 milyones nga kasong plunder.

***

Mas katuohan bang pasangil ni Guteza nga nihingalan ra nilang Co, Romualdez ug kanhi Kongresista Eric Yap? Gipuno na ba lang ang lista sa dugang mga opisyal sa gobyerno ug dugang mga maleta nga gihisgotan sa 18 ka kanhi marines?

Tinuod bang gisaaran ang kanhi marines og kuwarta sa pagpirma sa orihinal nga affidavit? Tinuod bang mas dakong kantidad ang gitanyag sa upat ka kanhi marines nga nibakwi sa pasangil?

***

Kataposang kasayuran ni Defensor mao nga luwas si Guteza ug naa sa kustodiya sa Philippine Marines. Pero gipanghimakak sa armadong kusog ang iyang pangangkon. Ug ang 28 ka adlaw nga Senate presidency ni Alan Peter Cayetano, nga gipatuong interesado sa flood scam, wala magtagad sa pagpatawag pagbalik ni Guteza.

Ambot nganong wala say seryusong paningkamot ang gobyerno sa pagpangita ni Guteza. Nakapasamot hinuon sa pagduda nga ang nipahilom ni Guteza ug nipabalitok sa upat niya ka kauban mao ang labing naka-benepisyo sa maniobra nga, nakatag-an ka, mao si Romualdez.