P2.2 milyong shabu, nasamsam sa HVI tulak

MANILA, Philippines — Mahigit P2.2-milyong halaga ng ilegal na droga ang nasamsam sa isang high value individual sa isinagawang buy-bust operation ng Manila Police District (MPD), sa Malate, Maynila, noong Huwebes.

Isinailalim na sa inquest proceedings sa Manila City Prosecutors’ Office ang 40-anyos na suspek sa reklamong paglabag sa Sections 5 at 11 ng Republic Act 9165 (Comprehensive Dangerous Drugs Act of 2002).

Sa ulat, dakong alas-5:40 ng hapon ng Agosto 6, nang madakip ang suspek ng mga operatiba ng MPD-Drug Enforcement Unit sa panulukan ng San Andres Street at Taal Street, Malate.

Nakipagtransaksyon ang suspek sa poseur-buyer at nang magkabayaran, gamit ang marked-money na may halong genuine P500 bill ay ipinatupad ang pag-aresto.

Nasamsam ang tinatayang 325 gramo ng shabu na nagkakahalaga ng P2,210,000.00 at narekober ang buy-bust money.