EDITORYAL - Pang-resign mo

Makatarunganon ba ang pamahayag ni Defense Secretary Gilberto “Gibo” Teodoro nga kung kinsa mang mga opisyales sa gobiyerno nga pro-China o adto dapig sa China sa isyu bahin sa West Philippine Sea, mas maayo pang mo-resign?

Init kaayo ang isyu bahin sa WPS tungod sa padayung pagpanghasi sa China sa Pilipinas pinaagi sa pagpadayun sa ilang pagpadala og mga barko didto aron babagan ang mga Pilipino nga makapanagat ug magamit ang mga resources nga naa niini.

Ning bag-o, usa ka dakong flotilla sa mga barkong panggubat sa People’s Liberation Army-Navy ang nasigpatan nagbahis-bahis sa Scarborough Shoal nga pwerteng doula na sa Zambales.

Kaning lugara maoy pinakaduol sa mainland Luzon sa tanang mga coral reefs ug shoals sa sulod sa WPS. Sa laktod, naa gyud mismo sa sulod sa tugkaran sa Pilipinas. Dili na ni coastguard o militia nga mga barko kondili panggubat na gyud.

Dili nila gustong tawgon ang China nga bully, dili nila gusto ang mga gipangbuhat sa mga sakop sa PCG, BFAR ug sa AFP pagpanalipod sa WPS kay pagpamikil daw ngadto sa China.

Unsa diay angay buhaton kun naay mosulod sa imong tugkaran nga imoha subay sa balaod unya angkunon og lain ug tukoran pa gyud og ilang balay?

Ning bag-og,  nagkatinubagay silang PCG Spokesman for the WPS Admiral Jay Tarriela ug si Davao City Congressman Paolo “Pulong” Duterte kinsa misaway sa pamahayag ni Teodoro bahin sa mga opisyales nga adto pusta sa China.

Giklaro hinuon ni Duterte nga ang panawagan niyang dili maayong i-demonize ang China wala nagpasbaot nga dapig siya sa China ug iyaha ng gi-surrender ang soberiniya sa Pilipinas sa WPS.

Kung buot tan-awon, walay sayop sa pamahayag ni Duterte, apan sa mata sa publiko dili kini maayo kay maisip kini nga pagdapig sa pikas.

Trabaho ni Tarriela ang moestorya ug mobutyag sa publiko ug sa kalibutan sa tanang illegal nga gipangbuhat sa China diha sa WPS, dili na kini ikahibulong.

Apan dinhi sa ato, samtang nagkamulo ang mga sakop sa Philippine Coastguard ug Bureau of Fisheries and Aquatic Resources sa pagpatrolya sa WPS, naay pipila ka mga opisyales sa gobiyerno ang dayag kaayong hadlok sa China o dapig ba hinuon kanila.