Walay kataposan nga pagbaha

Grabe na ka seryoso sa problema sa pagbaha sa Metro Cebu. Mora’g walay kataposan. Kada kusog sa ulan, daghang lugar ang maunlod sa baha. Mao nang di na ikatingala nga dako kaayo kini’g epekto sa ekonomiya.

Dili lang usa ang hinungdan. Ang unregulated urban development, lakip na ang upland development, nakapasamot sa problema. Ang mga kabukiran nga unta natural nga mo-absorb sa ulan, gipatindogan og mga subdivision ug komersiyal nga estruktura.

Ang resulta mao ang dakong bul-og sa tubig nga unta mohunong sa yuta, diretsong molugsong sa ubos, magtapok sa syudad, ug magbaha. Kini pun-an pa sa walay maayong sistema sa drainage.

Hinuon, ang problema sa grabe nga mga pagbaha sa Metro Cebu dili lang tungod sa grabe nga urbanisasyon karon. Resulta usab kini sa kakulang sa planning ug panglantaw sa atong mga nangaging lider.

Dili ikalimod nga sulod sa daghang dekada, hinay ang improvement sa drainage system ug flood control sa Metro Cebu ug probinsiya. Wala kita makakita og long-term solution sa mga pagbaha. Klaro nga ang mga lider kaniadto nagtan-aw lamang sa kalamboan nga pabor lang sa negosyo, konstruksyon ug ubang development. Wala sila naghunahuna sa seryoso nga epekto sa kalikopan ug sa katawhan.

Hinuon, sa Metro Cebu, adunay daghang proyekto nga giingong solusyon sa baha. Apan kasagaran niini temporaryo lamang ug dili sustenable.

Ang mga kanal gihinloan, apan human sa pipila ka bulan, balik na usab ang problema. Adunay mga dike ug flood control structures nga gitukod. Apan dili kini igo ug dili konektado sa mas konkreto nga masterplan.

Ang ultimong solusyon mao ang paghan-ay og usa ka holistic ug long-term nga flood management plan nga maglakip sa urban planning, environmental protection, ug teknikal nga paningkamot. Ug angay kana nga sugdan karon.