EDITORYAL — Lima ka tuig nga termino

Naa karuy giduso nga balaudnon sa Senado nga nagtinguhang palugwayan pa ang termino sa mga kasamtangang naglingkod nga mga opisyales sa barangay apil na ang Sangguniang Kabataan.

Ang Senate Bill 2387 nagtinguha nga amendahan ang Republic Act 12232 o “An Act Setting the Term of Office of Barangay Officials and Members of the Sangguniang Kabataan, and for Other Purposes.”

Si Sen. Francis Escudero maoy nangamahan sa maong balaudnon aron daw palig-unon ug mapadayun ang serbisyo publiko sa barangay level.

Buot sa balaudnon ni Escudero himuong lima ka tuig ang termino gikan sa kasamtangang upat ka tuig. Atong tuig 2023 giamendahan sad ang ilang termino gikan sa tulo ka tuig gihimong upat ka tuig.

Kung mapasar kini, modako ang gastos sa Comelec ug sa gobiyerno sa tuig 2028 kay madungan kini sa tuig nga diin himuon ang national and local elections.

Tungod ana, dako napud ang purohang isibog nasad og laing tuig ang barangay ug SK elections, agi og pagpasalamat sa mga makadaog unya nga mga kandidato sa May 2028.

Dako og papel ang mga managang kandidato sa May 2028 elections kay sigurado mang magpatabang ni sila sa barangay officials atol sa kampanya.

Pasaligan ang mga barangay officials nga kung sila makadaog, ilang suportahan o silay moduso og balaudnon para isibog ang eleksyon ug anang paagiha malugwayan ang ilang termino sa barangay.

Pagkatinuod ani, daghang mga maayong barangay officials nga kugihan ug tinuoray moserbisyo.  Kani sila maoy maayong malugwayan ang termino, apan dapat pinaagi sa eleksyon.

Pero kadtong mga badlungon, abusado, tapulan ug kurakot nga barangay ug SK officials kinahanglang ilisan ug dili na angay palugwayan ang ilang termino kay modako ang kadaut nga ilang mahatag sa ilang mga konstituwente.

Usahay makapaduda ning motibo sa ubang mga nasudnong mga magbabalaod, siguradong daghang mosuporta ani ug karon palang daan naa nay mga magbabalaod nga nagplanong modagan karong 2028 ang nagsige na og padayag og suporta ani.

Dili ikalimod, bisag ingnon pang “apolitical” o non-partisan ang mga barangay, kutob ra na sa papel ug estorya pero wala sa buhat kay duna na silay gilabanang lokal nga mga mayor nga sakop og political parties.