Ang tinuod nga Kapamilya

Basaha: Mt. 12;46-58

Sa pag-abot sa inahan ni Jesus ug sa iyang mga igsuon dunay nipahibalo kaniya sa ilang presensiya. Ang atong Ginoo igo lang mitubag Dungan ang pagtutok sa iyang mga tinun-an: “Ang motuman sa Sugo sa akong Amahan, mao man ang akong mga Igsuon ug mga Inahan!”

Dili lang kini mahitungod sa mga tawo nga nahimong kabahin sa atong kinabuhi gumikan sa dugo (consanguinity) maingon nga dili na kinahanglang isipon nimo ang tawo nga imong igsuon gumikan kay managsama kamog inahan. Mas maayo pa ang mga tawo nga dili nimo gani porsoso nga paryente apan mounong nimo sa malisud nga bahin sa imong kinabuhi.

Matud pa success is relative kay kun mamahimo kang successful modaghan ang imong kaliwat. Ning maong ebanghelyo karon, atong nakita nga niabot ang inahan ni Jesus ingon man ang iyang mga igsuong lalake ug babaye niabot ug nangita kaniya. Nagpasaabot ba kini nga duna siyay literal gyud nga mga igsuon sa usa lamang ka amahan ug inahan? Ang tubag dili. Kini tungod kay ang terminong adelphos kun brother o igsuon mamahimong applicable ngadto sa mga ig-agaw. Sa laing bahin gitataw ni Jesus nga ang iyang mga igsuon dili lang kadtong pinaagi sa dugo kondili kanila nga naminaw sa mga pulong sa Dios ug nagtuman niini. Kini ang hinungdan kun nganong mahinungdanon ang pagsunod sa tunob dili lang sa tawo. Ingon niini ang Kristohanong kinabuhi. Dili lang kini mahitungod sa atong pangalan ingon nga Kristohanon.

Hinunoa mahitungod kini sa paagi nga gibansay nato ang atong pagtuo. Kinahanglang ipakita gyud nato kini sa buhat aron sa ingon mamahimo kitang angayan ug takus nga pagatawgon ug mga igsuon Niya. Ingon ini usab ang pagsunod sa kinabuhi sa Ginoo mahitabo lamang kun atong tumanon ang iyang pagtulon-an.

Kun tinuod kitang nahigugma kaniya, dili nato palapuson sa pikas dunggan ang iyang pagtulon-an. Hinunoa, atong tumanon ug puy-an adlaw adlaw sa atong kinabuhi.