JVA tali sa dakbayan ug megawide subling ipasusi

CEBU, Philippines — Gihangyo ni Konsehal Sisinio Andales ang konseho nga susihon pag-usab ang revenue-sharing agreement sa Carbon Public Market Joint Venture Agreement (JVA) tali sa Kagamhanan sa Dakbayan sa Sugbo ug Megawide Construction Corporation.

Si Andales nipadayag og kabalaka pinaagi sa usa ka privilege speech bahin sa "guaranteed payment" nga bahin sa siyudad nga P50 milyon ubos sa supplemental agreement.

Base sa bag-uhay nga report sa Commission on Audit (COA), gisaysay ni Andales nga ang Carbon Market nakakuha og gibana-banang P80 milyones nga kita niadtong 2025. Dugang pa niya nga ang mga koleksyon gikan sa 2021 hangtod 2025 mokabat sab sa samang kantidad nga P80 milyones matag tuig.

Apan base sa audit, ang dakbayan nakadawat sa unang P50 milyones nga "guaranteed payment" niadtong 2022 ug wala na nay misunod nga bayad hangtud 2025.

Nipadayag og kabalaka ang konsehal sa padayon nga wala pag-remit sa annual guaranteed payments ngadto sa City Treasurer’s Office nga nalatid sa COA report. Mao nga nakapangutana ang konsehal kung pabor pa ba sa siyudad ang kasamtangang revenue-sharing agreement.

Gihisgutan usab niya ang COA report nga nagpakita nga adunay 188 ka delinquent stallholders nga adunay kapin P5 milyon nga wala mabayri nga abang, surcharge, interes ug garbage fees.

Gisugyot ni Andales ang pagpangayo sa mga dokumento bahin sa revenue-sharing, paghimo og special review committee aron susihon ang JVA, ug pagpatuman sa lease agreements batok sa mga delinquent stallholders.

Atol sa diskusyon, si Konsehal Joel Garganera miingon nga ang kaso sa Carbon redevelopment anaa pa sa korte ug dili angay magdali og konklusyon. Giklaro sab niya nga wala pa makakolekta ang Megawide gikan sa mga vendors ug ang P80 milyon mao ang gross collections sa siyudad nga kuhaan pa sa mga gasto sama sa maintenance, labor ug utilities.

Si Councilor Harry Eran nangayo usab og katin-awan bahin sa sugyot nga pagwagtang sa lease sa mga delinquent stallholders, samtang si Arcilla miingon nga kini sakop sa katungdanan sa Cebu City Market Authority.

Sa katapusan, giaprobahan sa konseho pinaagi sa omnibus motion ang hangyo nga pagsusi sa JVA. — (BANAT NEWS)