VP Sara bilyonarya

Maablihan nang bank accounts ug Income Tax Returns (ITRs) ni Bise Presidente Sara Duterte unya sa Hulyo 30. Nga hagbay rang giawhag sa mga nipasangil nga duna siyay binilyon ka pesos sa bangko. 2016 pang gibisto ni kanhi senador Antonio Trillanes nga dunay ?2.4 bilyones ang joint bank account nilang VP Sara ug sa iyang amahan nga si kanhi presidente Rodrigo Duterte. Niaging tuig pang gipaabot nga maablihan ang bank accounts pero naapsan sa pagbasura sa Korte Suprema sa orihinal nga articles of impeachment batok niya.

Maong walay lalis. Ang mabuot nga mga magbubuhis dugay nang naglaom sa pag-abot sa adlaw nga mapatin-aw ang kontrobersiya sa katigayonan ni VP Sara.

-o0o-

Karon pa lang, gipagamay na sa kampo ni VP Sara ang kapuslanan sa mga dokumento nga isumiter sa mga bangko, Anti-Money Laundering Council, ug Bureau of Internal Revenue. Bisan si Senator-judge Pia Cayetano nagduda kon magamit ba sa prosekusyon isip ebidensiya batok ni VP Sara.

Pero sakto si House Prosecutor Chel Diokno. Ang bank accounts ug ITRs makatabang sa pagpasabot sa higanteng kang-a tali sa gideklarar ni VP Sara nga ?88.5 milyones sa iyang Statement of Assets, Liabilities and Net Worth (SALN) ug sa report sa AMLC nga ?6.7 bilyones niyang bank transactions.

-o0o-

Gitambagan ang publiko sa pagtabang pagbantay sa mosunod:

•Dagkong deposito nga dili gikan sa lehitimong tinubdan (sama sa suweldo, ginansiya sa negosyo, o halin sa yuta o kabtangan);

•Paspas nga pagbalhin-balhin sa kuwarta sa daghang bank accounts aron pagsaag sa mga mosubay sa gigikanan ug destinasyon sa pundo;

•Mga transaksiyon nga ?499,000 ug paubos aron dili automatic nga ma-report sa mga bangko ngadto sa AMLC;

-o0o-

•Balik-balik nga pagbalhin sa kuwarta padulong o gikan sa mga indibiduwal o mga kompaniya nga walay negosyo o relasyon ni VP Sara, kabahin sa palusot nga niagi lang ug pagtago kinsay tinuod nga nakadawat;

•Motakdo bang SALN sa income tax ug bank deposits; ug

•Mga resibo kon moangkon si VP Sara nga nakadawat siya og gasa (deeds of donation ug buhis sa donasyon), kabilin (bayad sa estate tax) o nakadaog sa sugal (certification sa PCSO o PAGCOR).