EDITORYAL - China PA ang naagrabyado?

Human nigawas ang video bahin sa pagpangatake sa mga Chinese Coastguard sa mga sakop sa Philippine Navy nga nagbantay sa Ayungin Shoal o Second Thomas Shoal sa West Philippine Sea adtong Lunes, Hulyo 20, nipagawas sab sa ilang kaugalingong bersyon sa video ang China.

Ang pangangkon sa Chinese Embassy sa Manila, ang ilang mga sakop igo ra naghimo og legal nga pagpatrolya sa maong dapit.

Sa ilang bersyon sa video, sila maoy giunhan og atake sa mga Pilipino nga luwan og duha ka rigid hull inflatable boats (RHIBs). Ang komprontasyon niresulta sa pagkaangol sa usa sa mga sundalong Pilipino.

Pero kung tan-awon og maayo ang video sa mga Pilipino ug sa Chinese Coastguard, ang mga Chinese maoy preparado kaayo nga manghasi.

Sayod sila nga dili mogamit og pusil ang mga Pilipino apan gipangandaman gyud nila ni nga pisikal nga makapasakit sa atong mga sundalo nga nagbantay didto kay nagdala na silang daan tanan og baton nga maoy ilang gipangpuspos sa atong mga tropa.

Sa video sa China nga para naa silay ikapakita sa ilang mga kababayan, ilang gipagawas nga giprotektahan nila ang maong kadagatan gikan sa mga Pilipino.

Pero, ang tinuod nga nahitabo, sila maoy nanulong sa maong dapit  ug ilang gisulod sa laang ang mga dugay ng gabantay nga mga Pilipino. Pero gusto nilang ipagawas nga sila maoy agrabyado.

Kaning transparency initiative sa WPS gipasangil ni Senador Robin Padilla nga wartime propaganda ug maoy hinungdan nganong gisigehan karon og atake sa China ang mga sundalo nato sa WPS.

Ang maong inisyatiba usa ka maayong hinagiban sa Pilipinas para mahibaw-an sa tibuok kalibotan ang mga dautang gipangbuhat sa China diha sa WPS.

Ang Ayungin Shoal kabahin sa mga teritoryo sa Pilipinas nga naa sa sulod sa 200 nautical miles exclusive economic zone sa nasud nga gustong ilugon sa China gikan sa mga Pilipino.

Diha sa maong kadagatan tuyong gisangad sa Pilipinas ang BRP Sierra Madre nga bisan sa estado niini nga gitaya na ug dili na makadagan, nagpabilin kining aktibong barko ug sakop pa gihapon sa Philippine Navy fleet.

Gibantayan kini sa mga sakop sa PN ug Philippine Marines para kaugmaon sa mga mosunod nga henerasyon sa mga kabataang Pilipino.