Maynila, kinilala sa paggamit ng GIS technology sa disaster management
MANILA, Philippines — Kinilala ang Lungsod ng Maynila matapos nitong makuha ang Special Achievement in GIS (SAG) Award mula sa Esri, isang nangungunang kumpanya sa Geographic Information Systems (GIS), sa ginanap na Esri User Conference 2026 sa San Diego, California.
Pinangunahan ni Mayor Francisco “Isko Moreno” Domagoso ang delegasyon ng lungsod sa pagtanggap ng parangal. Ang Maynila ang nag-iisang awardee mula sa Pilipinas sa 197 organisasyong napili mula sa mahigit 700,000 gumagamit ng Esri technology sa buong mundo.
Ayon sa Esri, ibinibigay ang SAG Award sa mga pamahalaan at organisasyon na nagpapakita ng natatanging inobasyon at kahusayan sa paggamit ng GIS upang mapahusay ang serbisyo publiko, pagdedesisyon, at operasyon ng pamahalaan. Kabilang ang Maynila sa mga kinilalang institusyon mula sa Singapore, Turkey, Switzerland, Japan, at Kenya.
Ginagamit ng pamahalaang lungsod ang GIS technology sa digital mapping, spatial analysis, at real-time data monitoring upang mapalakas ang disaster preparedness at response, lalo na sa pagbaha, sunog, at iba pang emergency sa anim na distrito ng Maynila.
Sinabi ni Domagoso na ang pagkilala ay bunga ng pagsisikap ng Manila City Disaster Risk Reduction and Management Department (MCDRRMD) at GIS teams ng lungsod.
Kasama niya sa pagtanggap ng award sina Manila City Assessment Department OIC Atty. Ma. Cristina Fernandez, Manila GIS Team Leader Ramon Jefferson Verano, at MCDRRMD Research and Planning Chief Christian John Evangelista.
- Latest
