SLA Junior World Showcase mosikad na karong adlawa
CEBU, Philippines — Natapos na ang dugay nang paghulat tungod kay ang giatngan nga Sinag Liga Asya (SLA) Junior World Showcase Season 3.0 moarangkada na karong adlawa (Miyerkules, Hulyo 1).
Sa dili pa ang kulbahinam nga aksiyon sa korte, usa ka bonggang seremonyas sa pagbukas ang ipahigayon sugod sa alas-8 sa buntag sa Cebu Coliseum.
Pipila ka dagkong mga opisyal sa kagamhanan ug sports stakeholders ang gipaabot nga motambong sa programa apil na sila siCebu Governor Pamela Baricuatro ug Cebu City Mayor Nestor Archival, timaan sa kamahiungdanon ning internasyonal nga grassroots basketball tournament nga mipundok sa mga batan-ong talento gikan sa tibuok kalibutan.
Gikatakda sab nga mosaksi sa kalihukan sila si Cebu City Sports Commission (CCSC) and Cebu Provincial Sports Commission (CPSC) Chairman Dr. Rhoel Dejano, University of Cebu (UC) Chairman Atty. Augusto Go ug kapikas niining si Elizabeth Gan Go, Edmund Porter, Winley de la Fuente, ug Atty. Mans Carpio, bana ni Bise Presidente Sara Duterte.
Si Senador Christopher Lawrence “Bong” Go mohatag og video message alang sa tanang mga partisipante.
Ang lima ka adlaw nga torneyo pasalmotan sa 50 ka teams gikan sa Amerika, Canada, United Kingdom, Australia, United Arab Emirates, ug host Philippines nga mokumbati sa lima ka age groups:13, 15, 17, 19, ug 23 Under. Gawas sa Cebu Coliseum, ang ubang mga binyu naglangkob sa Cebu City Sports Institute, Magnum Sports Complex, ug University of San Carlos (USC)-Downtown Campus Gymnasium.
Si SLA Chairman Rocky Chan miawhag sa mga Sugbuanong fans paglantaw sa mga duwa kay libre kini sa publiko.
- Latest
