Daw iro nga Chihuahua

Nanawagan si Senador Erwin Tulfo nga repasohon ang R.A. 9344 o ang Juvenile Justice Welfare Act, uban ang pag-ingon nga ang bag-ong panghitabo diin nalambigit ang mga menor de edad naka-dangilag sa debate sa atong juvenile justice system.  Hinaut nga dili mapaakan ni Senador Tulfo ang iyang dila ni’ng iyang hagit nga repasohon ang balaod, aron lang ingnon nga isog.  Kay giingon baya nga, “Kon dili nimo mabuhat ang imong gipanghambog, nahisama ka lang sa iro nga Chihuahua nga nagsige lang og paghot luyo sa pultahan.”  Madahaan!

Maglisod pag-ila ang NBI

Matud pa sa National Bureau of Investigation (NBI) adunay lig-on nga indikasyon nga ania pa sa atong nasud si Senador Ronal “Bato” dela Rosa.  Padayon pa ang mga awtoridad sa pagpangita sa senador human moluwat ang International Criminal Court (ICC) og warrant of arrest batok sa naulahi.  Kon tinuod nga ania ra sa Pilipinas ang senador, ngano’ng dili man nila kini mapalgan?  Komento pa sa usa ka palahubog, “Daghan man gud kaayo ang bato dinhi sa atong nasud, busa maglisod gyud ang NBI pag-ila kon asa ug kinsa sa maong mga bato ang senador.”  Saoonz!                                        

Tabili ug buaya

Gikataho nga adunay higante’ng tabili nga gikan sa South America nga gitawag og Tegus ang misulong sa Amerika nga naka-pugos sa mga opisyal sa Georgia Department of Natural Resource sa pag-aghat sa mga residente sa pag-patay sa maong mananap kon ila kining makit-an tungod kay makadaut kini sa mga pananom ug uban pa’ng mananap tungod sa kalaug niini.  Dinhi sa Pilipinas, adunay mga buaya nga maingon nato nga kaliwat sa higanteng tabili sa Amerika nga hangol usab sa pundo sa kagamhanan.  Matud pa sa akong amigo, “Angay nga momando usab ang atong kagamhanan nga pamatyon ang mga buaya nga miguba, dili sa mga pananom, kon dili sa atong kaugmaon.”  Muleeng!

Ginikanan ang silotan

Human sa bayolente’ng panghitabo sa pipila ka mga eskwelahan, mipahigayon ang kagamhanan sa dakbayan sa Sugbo og usa ka multi-agency coordination meeting nga gitambungan sa mga representante sa DepEd, CHED, CCPO, Liga ng mga Barangay, Local School Board ug Sanggunian Kabataan Federation.  Tumong sa mayor nga mapalig-on ang hiniusang paningkamot aron maseguro ang kaluwasan ug kaayohan sa mga tinun-an.  Dugang sugyot sa akong amigo, “Kon adunay mga bata nga magpabadlong, mas maayo tingale nga ang ilang ginikanan maoy prisohan, aron motagam ang mga bata kon wala na’y inahan nga mag-atiman kanila.”  Fezteleern!

Nabu-ang sa “scatter”

Usa ka 43 anyos nga truck driver, nga gihinganlan og Galo, ang gidakop sa kapolisan tungod sa pagdispalko niini sa mokabat P40,000 nga pundo sa kompaniya nga iyang gitrabahoan.  Giingon’g nahurot pagkapilde sa “Scatter” ang nadispalko nga kwarta.  Tungod sa tinguha mga makabawi sa iyang pilde, nakapangawat og ahat ang driver.  Hinuon, dili tanan nakasaway sa maong bisyo sa pagpanugal. Kay matud pa sa usa ka sugarol. “Tungod sa sugal, nahiusa na karon ang akong pamilya, kay nagpuyo na man kami karon sa gamay’ng balay.” Pagkatoytoy!