EDITORYAL — Pasabton ang kabataan

Lain na pung mga tinun-an ang nabutang karon sa sitwasyon nga posible nilang  basulan ini’g abot sa panahon nga makaamgo na sila sa ilang nahimong kasaypanan.

Niadtong adlaw nga Biyernes, duha ka mga estudyante sa Aparri, Cagayan ang nasakpang nagdala sa og kutsilyo ug paltik nga armas atol sa pag-inspeksyon sa ilang mga gamit sa dihang padulong sila mosulod sa eskuylahan.

Nahitabo ni upat palang ka adlaw human sa nahitabong dugong pagpamusil sa sulod sa usa ka eskuylahan sa Tacloban City diin tulo ang namatay ug 20 ka tinun-an pa ang nangasamdan.

Bag-o pa kaayo o presko pa kaayo sa panumdoman sa tanan, ug posibleng nasayod ning mga bataa sa balita sa Tacloban City, pero murag wala ra man gihapon sa hunahuna kay nagdala man gihapon sila og hinagiban sa sulod sa ilang eskuylahan nga maoy nakaingon nga gidakop sila sa mga polis.

Kung analisahon og maayo, nganong ingon niana naman ang hunahuna aning ubang mga tinun-an? Makapangutana gyud ta karon kung natudloan ba gyud kaha nila sa ilang tulobagon sa balaod ug sa katilingban bahin aning ilang mga gipangbuhat karon?

Tungod ba kaha ni gihapon sa sayup nilang pagsabot sa balaod partikular ang Juvenile Welfare and Justice Law , Anti-Bullying Act of 2013 ug labaw sa tanan ang Anti- Child Abuse Law? 

Ang maong mga tinun-an sa Grade 8 nga 14 anyos nakuhaan og kutsilyo, samtang ang usa nga 15-anyos nakuhaan og .38 revolver nga naay duha ka bala. Para unsa man ni nila ang maong mga hinagiban?

Duna ba silay mga kontra o duna bay sekretong mga kaaway ning bataa o ba kaha gang wars sa sulod sa eskuylahan nga wala lang masayri sa mga magtutudlo o opisyales sa eskuylahan?

Maayo tingaling dunay himuong imbestigasyon ang mga otoridad uban sa koordinasyon sa DepEd kung duna bay mga panghitabo sa ilang mga tinun-an dili lang sa sulod sa eskuylahan kondili apil sab sa gawas ug dili tingklase.

Kinahanglan sab nga iapil sa pagtudlo diha sa ilang Homeroom classes ang kabahin aning mga balaora ug pasidan-an sila sa kung unsay mga nagtangag nga silot, epekto kanila ug sa ilang pamilya kung sila makalapas aning mga balaura.