Namaligya ‘slimming coffee’ gidakop

CEBU, Philippines — Duha ka babaye ang gidakop sa usa ka entrapment operation nga gipahigayon sa Criminal Investigation and Detection Group (CIDG) ug Food and Drug Administration (FDA) Region 7 sa Barangay Pahina Central, Cebu City niadtong Huwebes, Hunyo 25.

Ang mga suspetsado giila nga sila si alyas Geraldine, 39, ug Gracely, 35, mga empleyado sa Theris Beauty Products.

Gidakop ang duha tungod sa matud pa pagpamaligya og “Baian 3-in-1 Slimming Instant Coffee” nga naila usab sa brand nga “Lishou” nga wala marehistro sa Food and Drug Administration ug wala say otorisasyon nga ibaligya dinhi sa nasud.

Atol sa operasyon, dunay usa ka polis nga nagpakaaron-ingnon nga buyer ug nakapalit sa maong produkto hinungdan sa pagronda sa mga polis ug pagdakop sa mga suspetsado. Gikumpirma sa FDA Region 7 nga walay balidong Certificate of Product Registration (CPR) ang maong slimming coffee ug sakop kini sa advisory nga nagpasidaan sa publiko batok sa pagpalit, pagbaligya ug pag-apod-apod niini.

Napakyas usab ang mga suspetsado sa pagpakita og License to Operate (LTO), CPR, o ubang dokumento nga nagtugot kanila sa pagbaligya sa maong produkto.

Nasakmit sa operasyon ang pito ka kahon nga adunay kapin 600 ka sachet sa slimming coffee, buy-bust money nga mokabat sa P135,000, ug usa ka sales invoice.

 Gibanabana sa mga otoridad nga mokabat sa P200,000 ang kantidad sa tanang nasakmit nga ebidensya.

Ang mga suspetsado mag atubang og kaso tungod sa paglapas sa Food and Drug Administration Act of 2009. IBM BANAT NEWS