EDITORYAL - Mary Grace Piattos motestigo?

Sa ikalimang adlaw sa pre-trial conference bahin sa impeachment trial batok kang Bise Presidente Sara Duterte,  apil sa gilista nga ipatawag nga testigo ang kontrobersyal nga si “Mary Grace Piattos.”

Ang House prosecution panel nilista sa maong pangalan isip testigo. Nahimong kontrobersiyal ang maong pangalan human nga apil kini sa gipresentar sa Office of the Vice President sa mga matud pa nakadawat og confidential fund.

Ang maong pangalan miani og daghang pangutana sa publiko kung tinuod ba kini nga tawo tungod kay mura man og pangalan sa chichirya. 

Gawas sa maong pangalan duna pay daghang mga pangalan ang matud pa nakadawat sa maong pundo apan walay maka-beripikar kun tinuod ba gyud ni sila nga mga tawo.

Apan usa ray klaro, ang Mary Grace Piattos wala marehistro sa Philippine Statistics Authority human sa gihimong pagsusi sa kung unsa ka tinuod ang pangangkon sa OVP.

Naa pay uban nga mga pangalang gipresentar sa OVP sa hearing kaniadto nga dili sab makita sa talaan sa mga Pilipino diha sa PSA.

Wala silay nalista nga natawo dinhi, kasal ug bisan death certificate para makompirmar kun tinuod ba ni sila.

Si Duterte nag-atubang og kaso tungod sa pasangil nga walay klarong paggastos sa confidential fund niini.

Murag gituyo ni sa prosekusyon para pamatud-ang dili ni tinuod ang Mary Jane Piattos nga daan ng maoy pagduda sa mga magbabalaod ug sa publiko.

Nakahibalo gyud ang prosekusyon nga siguradong dili mosanong sa maong pangalan sa pagtambong unya sa impeachment hearing.

Gikatakdang sugdan ang impeachment trial karong Hulyo 6 nga dugay nga giatangan sa publiko.

Bisan unsa pay sangputanan niini, duna kini epekto sa umaabot nga eleksyon karong tuig 2028.