Copycat culture ug shooter worship

Sa nahitabong pamusil didto sa Tacloban City, nahimong sentro ang duha ka mga menor de edad nga maoy mga culprit sa maong insidente. Ang ilang rason sa pagbuhat sa ingon mao nga sila kuno mga biktima sa bullying. Apan bisan pa niini nahimo bang hinungdan o rason nga kun ikaw i-bully ang mopatay na lang og bisan kinsa.

Ambot lang kaha kun kadtong ilang gipamusil mao ba gyud ang nakasala o mga naangin lamang sa maong buhat. Nakita nga giplano gyud ang maong buhat. Gani nahimo silang nagtuon nang daan kalabot sa Juvenile Law.

Sa ato pa, sayud silang daan nga kun ilang buhaton ang maong krimen, dili sila mabilanggo sa kapasikaran nga sila mga menor de edad pa lamang. Upat ka mga kinabuhi ang nangawala ug daghan ang naangol sa maong mapintas nga binuhatan. Daghang mga pangandoy nga nagun-ob ug nalumpag gumikan sa maong kapintas.

Ang sinul-oban sa suspek daw sama sa sinul-oban sa duha ka mga batan-on sa laing nasud nga naghimo usab sa susamang buhat. Nagpasabot lamang kini nga kuyaw na kaayo ang katilingban ug dili na safe ang mga publikong dapit. Kinahanglang magmabinantayon kitang tanan.

Ang tanan nagsugod gyud sa pamilya. Kun unsay ilang nakat-onan sa pamilya mao usab ang ilang madala bisan. Taas kaayo level of awareness sa mga Kabataan karon apan low kaayo ang tolerance of pain. Sa among panahon bisan dunay bullying nga mosangpot sa sinumbagay apan wala sa among hunahuna ang mopatay. Kini ang mga batang ‘80s ngadto sa ‘90s.

Hinaut unta nga kining mga hitaboa dili mamahimong ma trending ug himoong pass time sa mga Kabataan nga buot mailado aron pagpanghambog nga sila mga asintado. Dili tanang kultura sundon ug ang si bisan kinsang mopatay ug modagmal dili angayang simbahon ug idolohon!