CA: “Invalid” ang suspension ni Gwen

Gideklarar sa 14th Division sa Court of Appeals nga “invalid” ug way legal nga epekto ang kamandoan sa Office of the Ombudsman nga nagpahamtang og unom ka buwan nga preventive suspension batok ni kanhi gobernador Gwen Garcia niadtong Abril sa miaging tuig.

Sa desisyon nga gipakanaog sa Court of Appeals niadtong Mayo 18, 2026, matud sa korte nga nakahimo og “grave abuse of discretion” si Ombudsman Samuel Martires sa pagmando niini nga ipaubos sa preventive suspension si Garcia bisan og supak ni sa Omnibus Election Code sanglit duna nay gipatuman nga election ban niadtong higayona nunot sa nagsing-abot nga eleksiyon niadtong Mayo 2025.

Nagkanayon ang CA nga nakalapas si Martires sa Section 261(x), Article XXII sa Omnibus Election Code ug sa Comelec Resolution No. 11059 sa pagmando nga ipaubos sa unom ka buwan nga preventive suspension si Garcia.

Segun sa maong balaod, gidili ang pagsuspenso sa mga opisyal ug kawani sa gobyerno panahon sa election period gawas lang kung ang kaso naglambigit og korapsiyon.

Ang kaso ni Garcia wala maglambigit og pasangil sa pagpangawat og pundo sa gobyerno hinungdan nga iyang gikwestiyon ang kamanduan sa Ombudsman pinaagi sa pagduso og petition for certiorari.

Ang kaso gipasikad sa reklamo nga gisang-at ni Moises Deiparine nunot sa paghatag ni Garcia og special permit alang sa pagpahigayon og quarry sa Mananga River nga giingong way environmental compliance certificate. Depensa ni Garcia dili quarry ang proyekto kon dili desilting aron pagtubag sa problema sa kakuwang sa supply sa tubig niadtong higayona.

Ilang gihimo ang desilting aron modagayday ang tubig ug magamit sa Metro Cebu Water District (MCWD) pagserbisyo ngadto sa mga konsumidor.

Bisan maisip nga awahi na ang tanan sanglit nahuman na ang suspension ug dako ang nahimong kadaot niini ngadto ni Garcia sa miaging eleksiyon apan may kapuslanan gihapon ang pagdeklarar sa CA nga invalid ang kamanduan sa Ombudsman.

Kini tungod kay nagpamatuod ni nga husto si Garcia sa iyang baruganan niadto nga misupak sa mando sa Ombudsman.

Lain niyang konswelo gawas nga posibling makapaningil siyag sweldo sulod sa mga buwan nga siya gisuspenso, mao nga makapangangkon siyang husto ug wala masayop sa iyang gibuhat ug nga biktima lang gyud siya sa kahugaw sa duwa sa politika.