Wa nay labot sa ihap

Daghan gyud nga mga suhito sa balaod nga mipadayag sa ilang opinyon nga kadtong mga sakop sa Senado nga mabilanggo, dili na apilon pag-ihap aron pagkuwenta sa quorum.

Kay kon si kanhi Supreme Court senior associate justice Antonio Carpio maoy pahukmon, si Senador Jinggoy Estrada nga gipriso karon tungod sa kaso nga Plunder, dili na gyud angay’ng apilon sa pagkuwenta og quorum sa Senado.

Matud ni Carpio nga “A senator who is a detention prisoner cannot hold public office, thus, he cannot attend Senate sessions or vote.

Necessarily, he cannot be included in determining any quorum or majority vote.”

Sa ato pa, 23 na lang ang Senador. Unya ang maisip nga quorum 12 ka senador nga motambong sa sesyon.

Dugang pagpasabot ni Carpio, “Let it be stressed that all prisoners whether under preventive detention or serving final sentence cannot practice their profession nor engage in any business or occupation, or hold office, elective or appointive, while in detention.”

Gitumbok ni Carpio ang kaso ni kanhi Senador Antonio Trillanes nga ang Supreme Court wa mo-grant sa hangyo ni Trillanes nga gitanggong tungod sa kalambigitan niya sa “Oakwood mutiny” niadtong 2003 nga unta buhian siya aron makatrabaho isip magbabalaod.

Apan gipangutana si Carpio kon nganong si Senador Leila de Lima natugotan man nga makapadayon pagsang-at og mga balaodnon bisan og siya gipriso, matud ni Carpio nga way mireklamo sa maong isyu.

Matud ni Carpio nga sa kaso ni Jinggoy, ang lagda sa Plunder Law nga gilatid sa Section 5 sa Republic Act 7080, ang akusado nga nag-atubang og kaso sa Sandiganbayan suspensohon sa iyang serbisyo.

* * *

Husto ang tambag ni Pasig City Mayor Vico Sotto nga undangon na unta sa mga botante ang ilang batasan nga ang pagpili nila og kandidato atol sa eleksyon, ibase nila sa personality, sama kon iladong apilyedo, sikat kay artista, ug abi kay sakop kini sa iladong banay.

Pero samtang nindot ning iyang sugyot, mora’g maunay siya niini kay nakatabang baya gyud sa iyang pagdaot ang iyang apilyedo nga Sotto, ug nailhan siya sa katawhan sa Pasig nga anak sa iladong TV personality nga sila si Vic Sotto ug Coney Reyes.

Apan makamao sab hinoon gyud kini si Vico Sotto kay taas man siya og nakab-ot nga edukasyon.

Nahimong inila sa publiko si Vico Sotto dihang gipilde niya ang mayor sa Pasig nga si Bobby Eusebio nga mihupot sa katungdanan pagka mayor sulod na sa 27 ka tuig. Kamo, mosuporta ba mo nga ang pagpili dili na ipaagi sa kainila sa usa ka kandidato, bisan og nasayod mo nga kon modaog ni way maayong buhat.