Gawasnon na ba kita?

Matag Hunyo 12 saulogon nato ang Independence Day. Daghang mga flag raising ceremonies, daghang mga speeches matud pa.

Apan ang pangutana mao: “Gawasnon na ba gyud kita karon?” Dako ba gyud ang tampo ni Aguinaldo alang niini?

Unsaon naman lang si Andres Bonifacio nga namatay gumikan sa pagluib mismo sa iyang mga kaubanang Pilipino?

Si Heneral Luna nga giunay og tiklo sa iyang mga kaubanan.

Ang tanan nahitabo gumikan sa kamatuoran nga bisan kaniadto hangtud karon daghang mga tawo ang hakog sa gahom.

Mga tawo nga naputos sa kangitngit sa walay kasegurohan nga aron mapanalipdan ang dakong delusion sa ilang pagkagamhanan ang andam ug tagana nga mopatay bisan sa mga suod nila mapanalipdan lamang ang ilang seguridad ug dili sila mapapahawa sa ilang nahimutangan.

Sa laing bahin, nahimo ba kitang gawasnon sa sayop nga panlantaw sa kaugalingon. Nga ang kaugalingong molungtad ug dili mahulipan.

Nga ang kaugalingon magpabiling permanente taliwala sa mga kausaban.

Kun pabilin kitang anaa ning maong panglantaw nan, pabilin gihapon kitang binilanggo.

Ang tanan mausab ug bisan gani ang loyalty mahimong mahanaw kun mahunong na ang benepisyo nga nadawat.

Ang bugtong magpabilin ning kinabuhia mao ra gyud ang kamatayon nga mahimong mopapas kanato sa nawong sa yuta.