Walay kinutobang paugat

Kuwestiyonable ang pagpangugat sa tulo ka senador - Alan Peter ug Pia Cayetano, ug Loren Legarda -– nga 13 ang quorum ubos sa 1987 Constitution ug Senate Rules, bisan sa baruganan sa mga eksperto sa balaod nga base sa desisyon sa Korte Suprema sa Avelino v. Cuenco sa 1949 dunay quorum ug legal ang tanang gihimo sa 12 ka senador sa sesyon niadtong Hunyo 3.

Mas kuwestiyonable pa: Kabahin sila sa mga Senado nga nipatigbabaw sa quorum sa 12 ka senador ubos sa Avelino doctrine niadtong 2008, 2009, 2010, 2012 (kaduha) ug 2015 (kaduha).

Bisan gihukasan na sa ilang mga puwesto ug komitiba, nagpatuo ang Cayetano bloc nga public hearing kadtong ilang pagtuki sa affidavit sa 18 ka kargador ni Zaldy Co nga nangangkon nga nakahatod og mga maletang gisudlan og kapin P800 bilyones ngadto sa gipasanginlang mga kawatan sa flood-control projects.

Nabantang nga dili tinarung ang ilang gihimo. Apil si Legarda sa ginganlan sa affidavit, kay gihimo niadtong kontra pa sila. Pero karong alyado na, gilaktawan ang ngalan ni Legarda. Ug nangayo og pasaylo ang mga kargador nga nasaypan lang nila.

Bisan giila na sa Malacañang, House of Representatives, ug bisan sa Senate website ang liderato ni acting Senate President Sherwin Gatchalian, nagpabaga og sugyot si Cayetano nga paapilon siya og pirma sa mga dokumento aron hapsay ang operasyon sa Senado.

Si Cayetano ang nagpasiugda sa krisis sa Senado, apil nang iyang pagtago ug pagpaikyas ni Bato dela Rosa ug pagtugot sa butobuto sa pekeng atake sa Senate building. Sakto si Senador Ping Lacson siyay problema nga nagpatuong dunay solusyon.

Pero dili na kinahanglan nga mag-antos si Gatchalian sa pagpaminaw sa mga paukyab ni Cayetano. Kon tinuod ang eksklusibong report sa peryodistang si Ellen Tordesillas sa Vera Files nga mobiya na si Senador Joel Villanueva sa Cayetano bloc aron mahimong ika-13 nga sakop sa majority bloc.

Kon mahinayon ang special session karong buwana, pormal nang mapili si Gatchalian isip Senate President, duna nay bag-ong Senate president pro tempore ug mahingpit nang reorganisasyon sa mga komitiba. Wala hinuoy garantiya nga mohunong na og panglawgaw silang Alan Peter ug Pia Cayetano, Legarda, ug kaubanan.