Sara hadlok sa husay

Dihang naumol ang majority bloc sa 13 ka senador nga nipahimutang ni Alan Peter Cayetano isip Senate president, nga ni-convene dayon sa impeachment court pinaagi sa pagpapanumpa sa senator-judges, nipasalig dayon ang defense team ni Bise Presidente Sara Duterte nga mosubay sila sa proseso.

Pero dihang napalagpot si Cayetano tungod sa pagkatukod sa bag-ong majority bloc sa 12 ka senador, nahilom ang kampo ni VP Sara. Bugtong giluwatan mao ang pormal nga tubag sa articles of impeachment nga naghisgot sa tanang technicalities pero wala motubag sa bisan unsang pasangil.

* * *

Ang pagpamugos sa Cayetano bloc pagpaminaw sa 18 ka kanhi marines bisan bag-o nang liderato sa Blue Ribbon Committee gitumong pagpakauwaw sa administrasyon ni Presidente Ferdinand Marcos Jr., labi na sa House panel of prosecutors.

Ang pagsalig nga pinaagi sa pagpasangil nilang Lead Prosecutor Jinky Luistro ug kaubanan nga nakadawat og mga maleta sa kuwarta wala nay motuo sa mga ebidensiya nga ipresentar sa impeachment trial, napakyas sila. Kay naneguro man hinuon ang mga kongresista nga makakumbinser ang mga ebidensiya og 16 ka senador sa pagkonbikto ni VP Sara.

* * *

Laing linya sa propaganda batok sa impeachment trial mao ang pasalig nga bisan unsa kalig-on sa mga ebidensiya sa prosekusyon, ang bag-ong mayoriya sa Senado nga 12, bisan mahimo pang 13, 14, o 15, inutil sa pagka-absuwelto ni VP Sara.

Gipabugnaw nilang daan ang mga nag-atang sa bag-ong kasayuran gikan sa impeachment trial: Ayaw na lang mo pagdahom nga dunay mahitabo sa husay kay daog nang daan si VP Sara.

* * *

Mga pasumbingay nibisto sa tinuod nga baruganan ni VP Sara: Dili siya ganahan nga makabuylo ang impeachment trial; maong ni-petisyon sa Korte Suprema nga pugngan ang husay ug gikudeta ang Senado aron makontrolar ang direksiyon kon duna may husay.

Kay labing dakong kahadlok ni VP Sara mao ang pagkabisto sa iyang bank accounts ug income tax returns. Kay nahadlok nga, kon moulbo ang public opinion kay makumbinser sa pasangil sa pangawat ug paglapas sa konstitusyon, lima na lang ka lunod-patay nga senator-judges ang modupa. Maong nagsugod nang pangilad nga, bisan nagmingaw ang nangaging mga protesta, minilyon ang mokuyog sa people power karong Hunyo 12.