Tupad workers pinakilos ng DOLE sa Brigada Eskwela
MANILA, Philippines — Pinakikilos ng Department of Labor and Employment (DOLE) ang nasa 240,000 benepisyaryo ng (Tulong Panghanapbuhay sa Ating Disadvantaged/Displaced Workers) para tumulong sa Brigada Eskwela—ang paglilinis at pagkukumpuni ng nasa 5,000 paaralan sa buong bansa.
Nabatid na simula ngayong Lunes, Hunyo 1, kasama sa paglilinis, pagkukumpuni, at pagpipintura bilang paghahanda ng mga pampublikong paaralan ang mga Parent-Teacher Association (PTA) para sa pagbubukas ng School Year 2026–2027.
Ayon kay Labor Secretary Francis Tolentino, kasabay ng Brigada Eskwela ang nationwide rollout ng programa upang makapagbigay ng agarang trabaho sa mga displaced at disadvantaged workers habang natutugunan ang pangangailangan ng mga paaralan bago magsimula ang klase.
Sinabi ni Tolentino na sabay-sabay itong ipatutupad sa lahat ng rehiyon matapos ang koordinasyon ng mga DOLE regional director upang matiyak ang maayos na implementasyon ng programa.
Dagdag pa ng kalihim, hindi na lamang tugon sa kalamidad ang TUPAD, kundi isa na rin itong paraan upang pasiglahin ang lokal na ekonomiya at suportahan ang direktiba ni Pangulong Ferdinand R. Marcos Jr. na magbigay ng kabuhayan sa mga manggagawang nangangailangan ng tulong.
- Latest
