Philippines bets hataw ng 1 silver, 1 bronze sa Asian meet

MANILA, Philippines —  Pumasok na ang Pilipinas sa medal tally matapos kumana ang Pinoy tracksters ng isang pilak at isang tansong medalya sa Asian U20 Athletics Championships na ginaganap sa Kai Tak Youth Sports Ground sa Hong Kong.

Nagpasiklab sina Ana Bhianca Espenilla at Jerico Cadag sa kani-kanyang paboritong events para makasiguro ng medalya.

Hindi ininda ni Espenilla ang malamyang simula nito upang makasikwat ng pilak sa javelin throw event.

Sa limang attempts, pinakamaganda na ang 47.71 metro na naitala ng 19-anyos Tigao Island, Masbate pride.

Ngunit inilabas ni Espenilla ang buong lakas nito sa kanyang final attempt para makuha ang perso­nal-best na 52.20 metro na nagdala sa kanya sa pilak.

“Ang mga una kong throws wala talaga kaya nagulat ako sa huling throw ko. Sabi ko lang sa sarili ko na bahala na, itatapon ko na lang ito kaya hindi ko talaga inexpect na mag-52 (meters),’’ ani Espenilla.

Magandang panalo ito para kay Espenilla bago sumabak sa World U20 Athletics Championships sa Oregon sa Agosto 5 hanggang 9 kung saan makakasama nito sa kampanya sina Jeralyn Rodriguez (400m), Naomi Cesar (800m) at Ivan Cabanda (400m hurdles).

Hataw din si Cadag na nakahirit ng tanso sa men’s 3000m steeplechase.

Nagtala si Cadag ng 9:35.10 para makuha nag ikatlong puwesto habang nanguna si Indian Nikhil Chandrashekar (9:25.44) at pumangalawa si Japanese Yuu Kato (9:27.30).